قازاقستاندا 7 مىڭنان استام مەكتەپتە العاشقى قوڭىراۋ سوعىلادى
بيىلعى وقۋ جىلىندا ەلىمىزدەگى مەكتەپتەردە 3 ميلليوننان استام وقۋشى ءبىلىم الاتىن بولادى، دەپ حابارلايدى قازاقپارات ءتىلشىسى.
ءبىلىم جانە عىلىم مينيسترلىگىنىڭ مالىمەتىنە سۇيەنەر بولساق، جاز كەزىندە قازاقستاندا 21 مەكتەپ اشىلعان. رەسپۋبليكالىق بيۋدجەت قاراجاتى ەسەبىنەن وعان قوسا 110 مەكتەپ سالىنىپ جاتىر. ونىڭ ىشىندە 72 سى بيىل پايدالانۋعا بەرىلەدى. جەرگىلىكتى بيۋدجەت ەسەبىنەن 94 مەكتەپ، 29 مەكتەپكە قوسالقى قۇرىلىس سالىنۋدا.
ونىڭ 17 مەكتەبى مەن 15 قوسالقى قۇرىلىسى پايدالانۋعا بەرىلگەن. سونىمەن قاتار، 166 مەكتەپتە جوندەۋ جۇمىستارى جۇرگىزىلگەن.
مەكتەپتەردە ورتكە قارسى قاۋىپسىزدىك تۇرعىسىنان جالپى 4 ميلليارد تەڭگەدەن استام سوماعا وتتان قورعاۋ، ءورت سوندىرگىشتى تولتىرۋ، اۆتوماتتاندىرىلعان ءورت ءسوندىرۋ جۇيەسىن جوندەۋ جۇمىستارى جۇرگىزىلگەن.
3، 6، 8 -سىنىپ وقۋشىلارىنا وقۋلىقتار ساتىپ الۋ ءۇشىن بيىل 28,6 ميلليون تەڭگە بولىنگەن. ب ع م اقپاراتىنا سەنەر بولساق، 20 -تامىزداعى جاعداي بويىنشا باسپالاردان وقۋلىقتاردى جەتكىزۋ ۇلەسى 82,7 پايىزدى قۇراپ وتىر. سونىمەن قاتار، تەگىن ىستىق تاماقپەن 275876 ادامدى قامتاماسىز ەتۋ جوسپارلانعان. بۇل جەكەلەگەن ءبىلىم الۋشى ساناتتارىنىڭ 95,2 پايىزىن قۇرايدى.
جەرگىلىكتى بيۋدجەتتەردىڭ جانە دەمەۋشىلىك كومەك ەسەبىنەن تەگىن ىستىق تاماقتاندىرۋمەن 495086 مەكتەپ وقۋشىسى نەمەسە وقۋشىلاردىڭ 17,6 پايىزى قامتاماسىز ەتىلەدى. قالعان وقۋشىلاردىڭ مەكتەپتە تاماقتاندىرىلۋىن جەرگىلىكتى اتقارۋشى ورگاندار اتا-انالار ەسەبىنەن ۇيىمداستىرادى. رەسپۋبليكانىڭ ءۇش ايماعىندا اكىمدەردىڭ باستاماسىمەن تەگىن ىستىق تاماقتاندىرۋ باستاۋىش سىنىپتاردىڭ بارلىق وقۋشىلارى ءۇشىن ۇيىمداستىرىلعان.
مەكتەپتەرى جوق اۋىلدى ەلدى مەكەندەردە تۇراتىن 24084 بالانى وقۋ ورنىنا تاسىمالداۋ (98 پايىزعا) شاراسى ۇيىمداستىرىلعان.
