وسكەمەندىك تانىمال بلوگەر 7 جىلعا سوتتالدى
ەندى سوتتالعان ازامات ماكسيمالدى قاۋىپسىزدىك مەكەمەسىندە جازاسىن وتەيدى. سونداي- اق بلوگەردىڭ مۇلكى تۇگەل تاركىلەندى، دەپ حابارلايدى matritca.kz باسىلىمى.
وعان «اسا ءىرى كولەمدە اقشا بوپسالادى» دەگەن ايىپ تاعىلدى.
سوت ۇكىمىنە سايكەس، ەلەنا يۆانوۆا ەسىمدى قىزدى زورلاعانى تۋرالى اقپاراتتى تاراتپاۋ ءۇشىن رينات حالىقوۆ «ەرجان ىسقاقوۆتان تامىزدان قازانعا دەيىن بىرنەشە رەت اقشا جانە وسكەمەن ورتالىعىنداعى ءۇش بولمەلى پاتەرىنە سەنىمحات بەرۋىن تالاپ ەتكەن» .
ءىس ماتەريالدارىنا سۇيەنسەك، ەر ادام 30 مىڭ ا ق ش دوللارىن الىپ تۇرعان جەرىندە ۇستالعان.
كەشە رينات حالىقوۆ ەرجان ىسقاقوۆتان كەشىرىم سۇرادى.
«مەن ءوز كىنامدى تولىق مويىندايمىن جانە ەرجان ىسقاقوۆتان كەشىرىم سۇرايمىن. ول كەزدە مەن ونىڭ قانداي ادام ەكەنىن بىلمەدىم. ءبىراق قازىر جاساعان ءىسىم ءۇشىن وكىنەمىن. مەن سونشالىقتى جامان ادام ەمەسپىن. قوعام ءۇشىن ۇنەمى جاقسى نارسە جاساۋعا تىرىستىم. وسكەمەن حالقىن ءتۇرلى باستاماعا شاقىردىم جانە ول قولىمنان كەلەتىن. مەنى كەشىرەدى دەپ ويلايمىن، مەنىڭ ءومىر ءسۇرىپ، جۇمىس ىستەگىم كەلەدى» ، - دەدى رينات حالىقوۆ.
زارداپ شەگۋشى بلوگەردى كەشىردى. ول رينات حالىقوۆقا سوت شىعىندارىن - وتىز مىڭ تەڭگەگە جۋىق اقشانى دا تولەپ بەرگەن.
«مەن رينات حالىقوۆتى كەشىردىم. ءوز كىناسىن مويىنداعانىن ءتۇسىندىم. ونىڭ ماتەريالدىق جاعدايىنىڭ قيىندىعىنا بايلانىستى ءمورالدى شىعىندى وتەۋىن تالاپ ەتپەيمىن. وعان «بوپسالاۋ» بابى بويىنشا ەڭ از مەرزىم - جەتى جىل باس بوستاندىعىنان ايىرۋ جازاسىن كەسۋدى سۇرايمىن. ءبىراق ونىڭ مەنەن اقشا بوپسالاعانىنا سەنىمدىمىن جانە ءوز شاعىمىمنان باس تارتپايمىن» ، - دەدى ەرجان ىسقاقوۆ.
