ءبىز «پايدالى» ساناپ كەلگەن 7 ادەت

استانا. قازاقپارات - دەنساۋلىعىمىز بەن سىمباتىمىزدى ساقتاۋ ءۇشىن قاجەت دەپ بىلەتىن ادەتتەر قاي- قايسىمىزدىڭ بولماسىن بويىمىزدان تابىلادى.

ولاردىڭ جەمىستەردى جۋۋ نەمەسە تۇراقتى تۇردە سپورتپەن شۇعىلدانۋ سىندى كەيبىرى، شىندىعىندا دا، پايدالى بولسا، قايسى ءبىرىنىڭ دۇرىستىعى مەن پايدالىلىعى سانامىزدا سانداعان ساۋالدار تۋىنداتادى.

بۇل ورايدا ەشقانداي پايداسى جوق 7 ادەتتىڭ ءتىزىمىن جاساپ، نازارلارىڭىزعا ۇسىنعاندى ءجون كوردىك.

مۋلتيدارۋمەندەر قابىلداۋ

مۋلتيدارۋمەندەر مەن ءتۇرلى بيوقوسپالاردى قابىلداۋ اۋرۋلاردىڭ پايدا بولۋىنا اسەر ەتپەيدى جانە الدىن المايدى. وعان قوسا ەستە ساقتاۋ جانە جۇمىس قابىلەتىنە دە ىقپالى جوق. ا ق ش عالىمدارى بىرنەشە كلينيكالىق زەرتتەۋ جۇمىستارىن جۇرگىزگەننەن كەيىن وسىنداي تۇجىرىم جاسادى. زەرتتەۋ جۇمىسىنا 450 مىڭنان اسا ادام قاتىسقان-دى. ال ناتيجەسى، ءتىپتى، مۋلتدارۋمەندەردىڭ ادام دەنساۋلىعىنا كەرى اسەرىن تيگىزەتىنىن كورسەتكەن.

باكتەرياعا قارسى گەلدەردىڭ قۇرامىندا سپيرت جوق تۇرلەرىن قولدانۋ

قول جۋۋعا ارنالعان باكتەرياعا قارسى گەلدەر، شىنىمەن دە، ۆيرۋستار مەن باكتەريالاردىڭ كوپتەگەن ءتۇرىن جويادى. الايدا ول قۇرامىندا كەمىندە %60 سپيرت بار گەلدەرگە قاتىستى. باسقالارى بارلىق ميكرواعزالارعا بىردەي اسەر ەتە بەرمەيدى. مىسالى، ولار نوروۆيرۋس پەن كريپتوسپوريدييلەرگە قارسى قاۋقارسىز. جانە پەستيتسيدتەرمەن بايلانىسقا تۇسكەن كەزدە جانە قولىڭىز قاتتى كىرلەگەندە قۇرامىندا ءسپيرتى بار قۇرالدار دا كومەكتەسە المايتىنى تاعى بار. بۇل جاعدايدا قولىڭىزدى سابىنداپ جۋعانىڭىز ابزال.

ناتري گلۋتاماتىنان باس تارتۋ

جۇرگىزىلگەن زەرتتەۋ جۇمىستارى ناتري گلۋتاماتى سالدارىنان پايدا بولاتىن باس اۋرۋى جانە جۇرەك اينۋى سىندى جاعىمسىز اۋرۋ بەلگىلەرى تەك اتالعان زاتتەكتى تازا كۇيىندە 3 گراممنان كەم بولمايتىن مولشەردە جەسەڭىز عانا پايدا بولاتىنىن كورسەتتى. ءىس جۇزىندە ول مۇمكىن ەمەس دەۋگە بولادى. قۇرامىنا گلۋتامات قوساتىن تاعامداردىڭ ءوزى دەنساۋلىق ءۇشىن اسا پايدالى ەمەستىگى - باسقا ماسەلە.

دەتوكس- ەمدام كومەگىمەن اعزانى تازارتۋ

تانىمالدىق الىپ كەلە جاتقان دەتوكس- باعدارلامالار اعزاڭىزدى ۋلى زاتتاردان تازارتۋعا ۋادە بەرەدى. ماماندار ءبىراۋىزدان ساۋ اعزانىڭ مۇنداي مىندەتتى وزدىگىنەن اتقارا الاتىنىن ايتادى. ەگەر باۋىرىڭىز بەن بۇيرەگىڭىز تىكەلەي مىندەتىن ورىنداي الماسا، دارىگەرگە قارالۋىڭىز كەرەك.

ورگانيكالىق ونىمدەردى تۇتىنۋ

كوپتەگەن ەلدە ورگانيكالىق ونىمدەرگە دەگەن تالاپتار مەن سەرتيفيكاتتاۋ ەرەجەلەرى جوق. سوندىقتان «ەكو» نەمەسە «بيو» بەلگىلەرى - كوپ جاعدايدا ماركەتينگتىك قۋلىق قانا. ول ءونىمنىڭ پەستيتسيدتەردىڭ قولدانۋىنسىز وسىرىلگەندىگىن بىلدىرمەيدى. ال ولاردىڭ پايداسى بازارلاردا ساتىلىپ جاتقان جەمىس- جيدەكتەردەگىمەن بىردەي.

ميكروتولقىندى پەشتەن باس تارتۋ

ميكروتولقىندى پەشتى قولدانعان كەزدە تاعامنىڭ قۇرامىنداعى پايدالى زاتتار بۇزىلۋى مۇمكىن، ءبىراق تاعامدى اس پليتاسىندا نە پەشتە جىلىتقان كەزدە دە ءدال وسى جاعداي ورىن الادى. ال كەي جاعدايلاردا تاعامدى ميكروتولقىندى پەشتە جىلدام جىلىتۋ پايدالى دا. مىسالى، اس قۇرامىنداعى س دارۋمەنى جاقسى ساقتالادى.

مايسىزداندىرىلعان ونىمدەرمەن اۋەستەنۋ

مايلار ءدال اقۋىزدار مەن كومىرسۋلار ءتارىزدى اعزامىزعا قاجەت. سوندىقتان كادىمگى سۇزبە نە يوگۋرتتى مايسىزداندىرىلعان تۇرلەرىنە الماستىرۋ - تاعامنىڭ قۇنارلىلىعىن تومەندەتۋدىڭ جاقسى ءتاسىلى ەمەس. سونىمەن قاتار كوپتەگەن مايسىزداندىرىلعان ونىمدەردە قۇنارلىلىق قۇندىلعىنىڭ جەتىسپەۋشىلىگى كوپ مولشەردەگى قانتپەن تولىقتىرىلادى. ول دەنساۋلىعىمىز ءۇشىن تىپتەن زيان.

 

Stan.kz