قىرعىزستان توڭكەرىس بولعان 7- ءساۋىردى مەرەكە دەپ جاريالادى
پرەزيدەنت المازبەك اتامبايەۆ بۇگىن 7- ءساۋىردى حالىقتىق ءساۋىر ريەۆوليۋتسياسى كۇنى دەپ رەسمي تۇردە تانۋ تۋرالى جارلىق شىعاردى.
2010-جىلى 7- ساۋىردە ۇكىمەتكە قارسى باستالعان جاپپاي قارسىلىق ناتيجەسىندە سول كەزدەگى پرەزيدەنت قۇرمانبەك باكيەۆ بيلىكتەن تايدىرىلعان. تولقۋلار كەزىندە قاۋىپسىزدىك كۇشتەرى دەمونسترانتتارعا وق اتىپ، 100 گە تارتا ادام قۇربان بولعان. ۇزاماي باكيەۆ ەلدەن قاشىپ كەتكەن.
قىرعىزستان پرەزيدەنتى باسپا ءسوز قىزمەتىنىڭ حابارلاۋىنشا، پرەزيدەنت جارلىعىنا ساي 17- ناۋرىز بەن 24- ناۋرىز دا مەملەكەتتىك مەرەكە رەتىندە اتاپ وتىلەدى.
2002-جىلى 17- ناۋرىزدا قىرعىزستاننىڭ وڭتۇستىگىندەگى اكسى اۋدانىندا دا ۇكىمەتكە قارسى تولقۋلار كەزىندە پوليتسيا ءتورت شەرۋشىنى اتىپ تاستاعان. ال 2005-جىلى 24- ناۋرىزدا بىشكەكتەگى ۇكىمەتكە قارسى شەرۋلەر ناتيجەسىندە سول كەزدەگى پرەزيدەنت اسقار اقايەۆ بيلىكتەن تايدىرىلعان. بۇل توڭكەرىس كەيىن «قىزعالدىق توڭكەرىس» اتالىپ كەتكەن.
«ازاتتىق»
