گيننەسستىڭ رەكوردتار كىتابىنا 7 مارتە ەنگەن قازاق
مارات تولەگەن ۇلى 1963 - جىلى ءساۋىر ايىنىڭ 19 - جۇلدىزىندا قاراعاندى وبلىسى فرۋنزە سوۆحوزىندا دۇنيەگە كەلگەن. اتا- اناسىنان ەرتە ايىرىلعان. مەكتەپتىڭ 1-8 - سىنىپتارىن قاراعاندى وبلىسىنىڭ بالالار ۇيىندە وقىپ، سوندا تاربيەلەنگەن.
ەكىباستۇز قالاسىنىڭ قۇرمەتتى تۇرعىنى. ول - مارافوننان حالىقارالىق سپورت شەبەرى. ونىڭ ءاربىر مارافونى كەمىندە 1200 شاقىرىمدى قامتيدى. مارافونشى 1992 - جىلى ءساۋىر ايىندا نەبارى 20 كۇننىڭ ىشىندە قارامقۇمدى، 1993 - جىلى 25 - اقپان مەن 23 - ناۋرىزدا 1700 شاقىرىمدى 24 كۇندە، ۇلكەن ۆيكتوريانى 1993 - جىلى 24 - قاراشا مەن 15 - جەلتوقساندا 1600 شاقىرىمدى 22 كۇندە جانە امەريكا قۇراما شتاتىنداعى نيەۆادا ءشولىن 1994 - جىلى 1-19 - ءساۋىر ارالىعىندا 1218 شاقىرىمدى 17 كۇندە باعىندىرعان.
1988 - جىلى جۇگىرۋ بويىنشا ءوزىنىڭ جەكە ادىستەمەسىن ويلاپ تابادى. 1991 - جىلدان باستاپ ونى ك س ر و- نىڭ ەڭبەك سىڭىرگەن جاتتىقتىرۋشىسى فەدور سكلوكين دايىنداعان.
1990 - 1991 - جىلدارى مارات 42 شاقىرىم 195 مەتردەن تۇراتىن 226 كلاسسيكالىق مارافوندى جۇگىرىپ شىققان. 1991 - جىلى 23 كۇندە 23 كلاسسيكالىق مارافونعا قاتارىنان قاتىسادى. تاپ وسى جىلى (ءبىر كۇندە ەكى مارافوننان) 30 كلاسسيكالىق مارافوندى 4 ساعات 54 سەكۋندتا جۇگىرىپ وتەدى. بۇل الەمدىك رەكوردتاردى ءالى كۇنگە دەيىن ەشكىم جاڭارتپاعان، دەپ جازادى massaget.kz.
مارافونشى سپورت ومىرىمەن قوش ايتىسقاننان كەيىن جەكە كاسىبىن اشقان. فوتو باسپا، مەيرامحانا كاسىبىمەن اينالىسادى. ەكى مارتە قالانىڭ ءماسليحات دەپۋتاتتىعىنا سايلانعان. قازاقستانداعى سپورتتى جانداندىرۋعا بەلسەنە ارالاسىپ تۇرادى. 2013 - جىلى مارات حالىقارالىق TED «جاڭا تۇراقتىلىق» كورمەسىنىڭ قاتىسۋشىسى بولعان.
TED (Technology Entertainment Design;) ماقساتى - دۇنيەدەگى ەڭ مىقتى ادامداردى ءبىر ورتاعا جيناپ، ءوز يدەياسىن بەرىلگەن ۋاقىتتا تولىعىمەن ايتىپ، تانىستىرۋ. مۇندا العاش رەت Macintosh كومپيۋتەرى مەن Sony كومپانياسىنىڭ كومپاكت- ديسكىسى تانىستىرىلعان. ولاردىڭ قاتارىندا بيلل گەيتس تە بار. وسى كونفەرەنتسيادا مارات تولەگەن ۇلى ءوزى ويلاپ تاپقان جۇگىرۋ ادىستەمەسىن تانىستىرادى. بۇل ادىستەمە ارقىلى كەز كەلگەن ادام كۇنىنە 80 شاقىرىم جۇگىرۋ مۇمكىندىگىنە يە بولا الادى.
