ءتورت وڭىردەگى مۇعالىمدەردىڭ جالاقاسى 790 مىڭ تەڭگەگە دەيىن وسەدى – ايماعامبەتوۆ
بۇل تۋرالى ءماجىلىستىڭ جالپى وتىرىسىندا ءبىلىم جانە عىلىم ءمينيسترى اسحات ايماعامبەتوۆ ءمالىم ەتتى، دەپ حابارلايدى قازاقپارات ءتىلشىسى.
بۇگىن پالاتا وتىرىسىندا دەپۋتات ءجاميلا نۇرمانبەتوۆا مۇعالىمدەردىڭ جەتىسپەۋشىلىگى مەن ءبىلىم بەرۋ ساپاسىندا ۇلكەن الشاقتىق بار وڭىرلەردى قولداۋ ماقساتىندا ۇزدىك پەداگوگتەردى تارتۋعا قاتىستى الەۋمەتتىك قولداۋ شارالارىنىڭ ءتيىستى توپتاماسىمەن ازىرلەنگەن ارنايى باعدارلاما بار ەكەنىن ەسكە سالدى.
«ونى ىسكە اسىرۋ ءۇشىن ناقتىلانعان رەسپۋبليكالىق بيۋدجەت جوباسىندا اتىراۋ، ماڭعىستاۋ، الماتى جانە تۇركىستان وبلىستارىنا ەكى مىڭعا جۋىق پەداگوگتى تارتۋ ءۇشىن 3,9 ميلليارد تەڭگە كوزدەلگەن. بۇل رەتتە اتالعان قاراجاتتا لاۋازىمدىق جالاقىعا 150 پايىز مولشەرىندە جالاقىعا ىنتالاندىرۋ ۇستەماقىسىن بەلگىلەۋگە عانا ارنالعان شىعىستار جوسپارلانعان. ءبىز الەۋمەتتىك قولداۋعا باعىتتالعان باسقا شىعىستاردى كورمەي وتىرمىز. وسىعان بايلانىستى باقا ەلدى مەكەندەردەن كوشىپ كەلگەن مۇعالىمدەر ءۇشىن تۇرعىن ۇيمەن قامتاماسىز ەتۋ ماسەلەسىن قوسا العاندا، الەۋمەتتىك توپتاما قانداي بولادى؟»، - دەپ سۇرادى دەپۋتات.
ءوز كەزەگىندە ءبىلىم جانە عىلىم ءمينيسترى اسحات ايماعامبەتوۆ بۇل باعدارلاما بيىل قىركۇيەك ايىنان باستالاتىنىن ايتتى.
«وسى قاراستىرىلىپ وتىرعان 3,9 ميلليارد تەڭگە ەكى ماسەلەنى دە قامتىپ وتىر. بىرىنشىدەن، مۇعالىمدەردىڭ ەكى ەسە جالاقى الۋى جانە بۇعان قوسا تۇرعىن ءۇي جالداۋ مەن كوممۋنالدىق شىعىنداردى تولەۋ ەسكەرىلگەن. نەگە ءبىز بۇل ماسەلەنى جالاقىنىڭ ىشىندە قاراستىرىپ وتىرمىز؟ ءبىزدىڭ زاڭناماعا سايكەس، تۇرعىن ءۇي جالداۋ مەن كوممۋنالدىق تولەماقىنى تەك جەرگىلىكتى بيۋدجەتتەن بەرە الامىز. سوندىقتان جەرگىلىكتى بيۋدجەتكە اۋىرپالىقتى تۇسىرمەس ءۇشىن جانە زاڭنامانى بۇزباۋ ءۇشىن بۇل ماسەلەنى جالاقى ارقىلى شەشىپ وتىرمىز. ماسەلەن، مۇنايلى اۋدانىنا كوشىپ باراتىن مۇعالىم قىركۇيەك ايىندا جالاقى الاتىن بولسا، وندا ونىڭ جالاقىسى 790 مىڭ تەڭگەگە جۋىق بولادى. سول 790 مىڭنىڭ 140 مىڭعا جۋىعى كوممۋنالدىق شىعىندار بولادى، ال 650 مىڭ تەڭگەگە جۋىعى - مۇعالىمنىڭ ءوز جالاقىسى»، - دەدى مينيستر.
بۇل تۇرعىلا ول ۆەدومستۆونىڭ بۇيرىعىندا جانە مۇعالىمنىڭ العان تۇبىرتەگىندە وسى ماسەلە جازىلاتىنىن اتاپ ءوتتى.
اۆتور: رۋسلان عابباسوۆ
