08:19, 23 - قاراشا 2015 | GMT +5
قىرعىزستان پرەمەرى: «بوينگ737» ۇشاعى اپاتىنان وپات بولعاندار جوق - فوتو
بىشكەك. قازاقپارات - وش اۋەجايىندا اۆيالاينەردىڭ اپاتتى جاعدايدا قونۋىنا قولايسىز اۋا رايى سەبەپ بولعان، دەپ حابارلادى جەرگىلىكتى ب ا ق قىرعىزستان ۇكىمەتىنىڭ باسپا ءسوز قىزمەتىنە سىلتەمە جاساپ.
اۋا رايىنىڭ قولايسىزدىعىنان ەكيپاج ۇشاقتى ەكىنشى تالپىنىستان سوڭ عانا قوندىرا العان. ۇشاق ۇشۋ-قونۋ جولاعىنان شىعىپ كەتكەن. ونىڭ قاناتى مەن دوڭگەلەگى ىستەن شىققان. ۇشاق بورتىندا بارلىعى 159 ادام بولعان.
ەسكە سالايىق، 22- قاراشادا كراسنويارسك- وش باعىتى بويىنشا AVJ 768 رەيسىن ورىنداعان «اۆيا ترافيك» اۋە كومپانياسىنىڭ «بوينگ 737» ۇشاعىنىڭ اپاتتى قونۋى كەزىندە التى ادام زارداپ شەكتى: اياعى اۋىر ايەل مەن ءتورت جولاۋشى، سونداي-اق ءبىر ۇشقىش اۋرۋحاناعا جەتكىزىلدى.
شۇعىل شاقىرىلعان كەڭەس كەزىندە ەل پرەمەر-ءمينيسترى تەمىر ساريەۆ توتەنشە جاعدايدى تەكسەرۋ جونىندە ۇكىمەتتىك كوميسسيا قۇرۋدى تاپسىردى.
«وش قالاسىنداعى وقىس وقيعانى تەكسەرۋ ناتيجەلەرى بويىنشا جولاۋشىلارعا وتەماقى تولەنەدى»، - دەدى ت. ساريەۆ.
