استانادا 71 جاستاعى اجەي ءزاۋلىم ۇيگە ساتىمەن جۇگىرىپ شىقتى

ۇيىمداستىرۋشىلاردىڭ ايتۋىنشا، Highvill SkyRunning قايىرىمدىلىق مارافونى وسىمەن ەكىنشى رەت وتكىزىلىپ وتىر.
جارىس شارتى بويىنشا، قاتىسۋشىلار الدىمەن 100 مەتر ديستانتسياعا جۇگىرىپ، ارتىنشا Highvill تۇرعىن ءۇي كەشەنىنىڭ ەڭ جوعارعى 34-قاباتىنا باسپالداقپەن (700 باسپالداق) شىعۋى ءتيىس بولدى.
وعان قاتىسۋعا قازاقستاننىڭ استانا، الماتى، پەتروپاۆل، ورال، قاراعاندا، كوكشەتاۋ جانە تاعى باسقا شاھارلارىنان، سونداي-اق مينسك، شتۋتگارت، فيلدەرشتادت سەكىلدى شەتەلدىك قالالاردان بارلىعى 326 (212 - ەر، 114 ايەل) ادام قاتىستى. سورەگە 280 جەلاياق جەتتى.
قاتىسۋشىلارعا ستارت پەن سورە ۋاقىتىن تىركەيتىن چيپتەر تاراتىلىپ بەردى. ءۇيدىڭ باسپالداق الاڭدارىندا 30 ۆولونتەر تۇردى. مەديتسينا قىزمەتكەرلەرى دە كەزەكشىلىك ەتتى.
جارىستا ەرلەر 18-30، 31-40، 41-50 جانە 51-60 جاس ساناتتارى، ال ايەلدەر 18-30، 31-40 جانە 41-50 جاس ساناتتارى بويىنشا باق سىنادى.
ايتا كەتەرلىگى، شاراعا جاستار ەرەكشە قىزىعۋشىلىق تانىتتى. قاتىسۋشىلاردىڭ جالپى سانىنىڭ 57% 18-30 جاس ارالىعىنداعى ادامداردىڭ قۇراعانى سونى ايعاقتايدى.
18-30 جاستاعى ەرلەر اراسىندا جەڭىمپاز ءالىمجان بالتابەك (3:48) بولدى. سونداي-اق 31-40 جاستاعىلار اراسىندا - اباي عالىموۆ (3:45)، 41-50 جاستاعىلار اراسىندا ەۆگەني مەدۆەدنيكوۆ (3:56) جانە 51-60 جاستاعىلار اراسىندا ۆلاديسلاۆ كاداتسكيح (4:45) توپ جاردى.
ايەلدەر اراسىندا 18-30 جاس ساناتىندا جەڭىمپاز ەلميرا مولداشيەۆا (5:28) اتاندى. 31-40 جاس كاتەگورياسىندا - ەكاتەرينا شاتنايا (5:03) جانە 41-50 جاس ساناتىندا نەللي مەدۆەديەۆا (5:54) ءبىرىنشى بولىپ كەلدى.
جارىستىڭ ەڭ ەگدە قاتىسۋشىسى 71 جاستاعى اجەي امەگۋلسين ميروشنيچەنكو 41-50 جاس ارالىعىنداعى ايەل قاتىسۋشىلارمەن جۇگىرىپ، Highvill- ءدىڭ بيىگىن 9 مينۋت 15 سەكۋندتا باعىندىردى. ەرلەر اراسىنداعى جاسى ەڭ ۇلكەن قاتىسۋشى - 64 جاستاعى قازبەك بەكەيەۆ بولدى. ول 34-قاباتقا 4 مينۋت 52 سەكۋندتا كوتەرىلىپ، 51-60 جاس ساناتىندا 2-ورىندى يەلەندى.
شارا سوڭىندا 5 سانات بويىنشا جەڭىمپازدار مەن جۇلدەگەرلەر 50 مىڭنان - 100 مىڭعا دەيىنگى اقشالاي سىيلىقتارمەن ماراپاتتالدى.
بيىلعى مارافون قايىرىمدىلىق ماقساتىندا ۇيىمداستىرىلىپ وتىرعانىن بۇعان دەيىن جازعان بولاتىنبىز.