قازاقستانداعى ءمارمار ۇنتاعىنىڭ 70 پايىز تەكەلىدە وندىرىلەدى
اسىرەسە، كاسىپكەرلەر كەندى شاھار اۋماعىنان شىعاتىن ءمارمار تاسىنان قۇرعاق قوسپا جاساۋدى جۇيەلى جولعا قويدى. ەۆگەني مايەرلە قازاقستاندا العاشقىلاردىڭ ءبىرى بولىپ قۇرعاق قوسپا شىعارۋدى قولعا العان. باستاپقىدا شەتەلگە بارىپ، ءمارمار تاسىن ۇنتاقتاۋ جولىن ۇيرەنىپتى. ەلگە كەلگەن سوڭ ىسكە كىرىسكەن. قازىر ول وسى باعىتتاعى ەكىنشى زاۋىتتىڭ ءوندىرىسىن جولعا قويدى. وتكەن جىلى سەرىكتەستىگى 23 مىڭ توننا دايىن ءونىم شىعارعان.
ەۆگەني مايەرلە، ءوندىرىس ورنىنىڭ اتقارۋشى ديرەكتورى:
- تاۋاردى وتكىزۋدە ەشقانداي كەدەرگى جوق. ۇنتاقتىڭ نەگىزگى بولىگىن قازاقستاندىق كومپانيالار ساتىپ الادى. ءۇش- ءتورت جىل بۇرىنعىمەن سالىستىرعاندا، ءونىم كولەمى ەسەلەپ ءوستى. بۇل ەلىمىزدەگى قۇرىلىس قارقىنىنىڭ ارتۋىنا بايلانىستى دەپ ويلايمىن.
ءوندىرىس ورنىندا قۇرىلىسقا قاجەت قۇرعاق قوسپانىڭ سان ءتۇرى بار. ءۇيدىڭ ءىشى مەن سىرتىنا دا جاعاتىنى جانە جەلىمدەۋگە ارنالعاندارى دا سامساپ تۇر. ميكروكولتسيدتىڭ 80 پايىزى ءمارمار ۇنتاعىنان تۇرسا، قالعانى حيميالىق قوسپا ەسەبىنەن تولتىرىلادى. كاسىپكەرلەر ونى گەرمانيادان تاسىمالداپ وتىر. وتاندىق ونىمگە جىلدان جىلعا سۇرانىس ارتىپ كەلەدى.
تۇرىسبەك ءجۇمادىلوۆ، تەكەلى قالالىق كاسىپكەرلەر پالاتاسى فيليالىنىڭ ديرەكتورى:
- قۇرىلىس سالاسىندا قولدانىلاتىن قۇرعاق قوسپا دەگەن بار. 5 جىل بۇرىن 100-120 مىڭ توننا شىعارىپ، مەملەكەتىمىز بويىنشا جىبەرسە، قازىر 200 مىڭ توننا ءونىمدى مەملەكەتىمىز جانە باسقا ەلدەرگە جىبەردى.
تەكەلىدە تاۋ تاسىن وڭدەيتىن وسىنداي 16 كاسىپورىن بار. سولاردىڭ ءبىرقاتارى ءمارمار مەن گرانيتتى پىشىندەپ، جولجيەك تاستاردى دايىندايدى. ءبىر كەزدەرى تۇرالاپ قالعان ءوندىرىس ورنى «مونوقالالاردى دامىتۋ» باعدارلاماسى اياسىندا 67 ميلليون تەڭگە نەسيە العان. قوماقتى قارجىعا ءوندىرىسىن جانداندىردى.
نيكولاي پاك، ءوندىرىس ورنىنىڭ اتقارۋشى ديرەكتورى:
- 10 جىل بۇرىن كاسىپورنىمىز توقتاپ تۇرعان ەدى. قازىر جۇمىسىمىز العا باسىپ، ءونىمنىڭ سان ءتۇرىن شىعارىپ وتىرمىز. شامامەن 2 مىڭ شارشى مەتر كەسپەتاس، 5 ك م- گە جەتەرلىك جولجيەك تاستاردى كەسىپ، قۇرىلىس كومپانيالارىنا ساتتىق.
كاسىپورىننىڭ قالا اۋماعىندا ءوز كەن ورنى بار. ول جەردەن ءمارمار تاسىن شىعارادى. ال گرانيتتى قاپالدان تاسىمالداپ وتىر. ءوندىرىس ورنى جىل باسىنان بەرى گرانيت تاستارىن كەسىپ، 200 تەكشە مەتر ءونىم شىعاردى. العاشقى تاۋارىن ورال قالاسىنا جونەلتپەك. ونداعى يساتاي- ماحامبەت باتىر مەموريالدى كەشەنىنىڭ قۇرىلىسىنا قولدانىلادى. ال كەلەسى بولىگى ساۋلەتى كەلىسكەن سانكت- پەتەربۋرگكە جىبەرىلمەك.
www.24.kz