بەس ءجۇز تەڭگەنىڭ پاراسى تۋرالى حابار بەرگەن سالىقشى 70 مىڭ تەڭگەنىڭ سىياقىسىن الۋى مۇمكىن

سىبايلاس جەمقورلىقتىڭ الدىن الۋ باسقارماسى باسشىسىنىڭ مىندەتىن اتقارۋشى دانيار رايىمبايەۆتىڭ سوزىنە قاراعاندا، 500 تەڭگەنىڭ پاراسى تۋرالى حابار بەرگەن سالىق قىزمەتكەرى - جاس مامان. ونىڭ جۇمىسقا كەلگەنىنە 2 اي عانا بولدى.
«بىزدە زاڭ بويىنشا سالىق ەسەبى جەكە كابينەت ارقىلى تاپسىرىلادى. ءاربىر ادام ءوزى كەلىپ، دەكلاراتسيانى تولتىرۋى ءتيىس. الايدا ول جەردە كەڭەس بەرەتىن مامان دا بار. ول بارلىق ادامدارعا كومەكتەسىپ وتىرادى. كاسىپكەر كەلىنشەك ءدال سول مامانعا پارا بەرگەن. ول كەلگەن بويدا زاڭسىز سىياقى بەرەمىن دەپ، قايتا- قايتا كومەك بەرۋدى سۇراعان ەكەن. سەبەبى كومپيۋتەر ارقىلى ەسەپ بەرۋدى بىلمەيدى. الايدا سالىق قىزمەتكەرى اقشانى بىردەن المايمىن دەدى. كۋاگەرلەر دە ونىڭ ءسوزىن راستاپ وتىر. دەگەنمەن، كەڭەسشى مامان باسقا بىرەۋگە كومەكتەسىپ جاتقاندا جاڭاعى كاسىپكەر ايەل 500 تەڭگەنى بىلدىرتپەي سالىپ جىبەردى. ءسويتىپ، ىلە-شالا كابينەتتەن شىعىپ كەتتى. ارتىنان سالىق قىزمەتكەرى قالتاسىنان اقشانى تاۋىپ العاندا بىردەن كەلىنشەكتىڭ سالىپ كەتكەنىن ءبىلدى. بەينەباقىلاۋ كامەرالارىنان دا سونىڭ ءبارىن بايقاۋعا بولادى. جاس جىگىت بىردەن باستىعىنا حابار بەردى. سەبەبى بىرەۋلەر ادەيى ىستەۋى مۇمكىن جانە تاعىسىن تاعى»، - دەدى د. رايىمبايەۆ قازاقپارات تىلشىسىنە بەرگەن سۇحباتىندا.
ونىڭ ايتۋىنشا، اتالعان وقيعا استانا قالاسى الماتى اۋداندىق مەملەكەتتىك كىرىستەر باسقارماسىندا بولعان. بۇگىندە 500 تەڭگەنىڭ پاراسى تۋرالى حابار بەرگەن جاس قىزمەتكەرگە سىياقى بەرۋ تۋرالى ۇسىنىس جاسالدى.
«زاڭ بويىنشا سىبايلاس جەمقورلىق ارەكەتتەرى تۋرالى حابارلاعان ادامدارعا سىياقى بەرۋ قاراستىرىلعان. ءبىزدىڭ دەپارتامەنتىمىز ءتيىستى ۇسىنىستى جاسادى. اكىمشىلىك ءتارتىپ بۇزۋشىلىقتار تۋرالى حابار بەرگەنى ءۇشىن 30 ا ە ك (72150 تەڭگە) كولەمىندە سىياقى قاراستىرىلعان. جاڭاعى قىزمەتكەر وسى سىياقىنى الۋى ابدەن مۇمكىن»، - دەپ اتاپ كورسەتتى د. رايىمبايەۆ.
ايتا كەتەيىك، كەشە استانا قالاسى بويىنشا مەملەكەتتىك كىرىستەر دەپارتامەنتى 500 تەڭگەنىڭ پاراسى تۋرالى حابار تاراتتى. ناۋرىز ايىندا ا. جۇماقايەۆا دەگەن كاسىپكەر سالىق تولەۋشىنىڭ جەكە كابينەتى ارقىلى ەسەپ تاپسىرعاندا 500 تەڭگە كولەمىندە پارا بەرگەن. سالىق قىزمەتكەرى ا. قۇسپانوۆ بىردەن ءوز باسشىلىعىنا حابارلادى. وتكەن ايدا شىققان سوت شەشىمىنە سايكەس، كاسىپكەر كەلىنشەك 336700 تەڭگە كولەمىندە ايىپپۇل تولەۋگە مىندەتتەلدى.