اتى اڭىزعا اينالعان «قارا مايور» 70 جاسقا تولدى
اتى اڭىزعا اينالعان وتستاۆكاداعى پولكوۆنيكتىڭ مەرەيتويى الماتىداعى اسكەر ۇيىندە ءوتتى.
اتاقتى مۇسىلمان باتالونىنىڭ كومانديرىن قۇتتىقتاۋعا اۋعان سوعىسىنىڭ ارداگەرلەرى، جاڭا كۋرسانتتار، اسكەري ماماندار، الماتى وبلىسى مەن قالاسى اكىمشىلىگىنىڭ وكىلدەرى كەلدى.
«مەن قولاستىمداعى وفيسەرلەرگە العىسىمدى ايتامىن. ولار ءوز ءىسىنىڭ قاس شەبەرلەرى. ال مەنىڭ مىندەتىم ولاردى وپەراتسياعا اپارىپ، امان- ەسەن قايتىپ اكەلۋ بولاتىن. 2 جىل، 2 اي، 5 كۇندە 45 ادامىمنان ايرىلدىم. سوعىس بار جەردە، ءولىم بار. سوندىقتان قازا بولعانداردى 1 مينۋت ۇنسىزدىكپەن ەسكە الۋلارىڭىزدى سۇرايمىن»، - دەدى بوريس كەرىمبايەۆ.
ق ر قورعانىس مينيسترلىگى اتىنان مەرەيتويعا وراي بوريس كەرىمبايەۆ «ەل قورعانى» مەدالىمەن ماراپاتتالدى.
ايتا كەتەيىك، اتاقتى قارا مايور بوريس توكەن ۇلى كەرىمبايەۆ 1948 -جىلى 12 - قاڭتاردا الماتى وبلىسى جامبىل اۋدانىندا دۇنيەگە كەلگەن. 1970 -جىلى ۆ. ي. لەنين اتىنداعى تاشكەنت اسكەري ۋچيليشەسىن ءتامامداعان. 1980-1983 -جىلدارى اۋعان سوعىسىنا قاتىسىپ ارنايى تاپسىرمالاردى ورىندايتىن مۇسىلمان باتالونىنىڭ كومانديرى بولدى. ساۋاتتى باسشىلىقتىڭ ارقاسىندا باتىر كومانديردىڭ ساربازدارى از شىعىنعا ۇشىراپ، كوبىنەسە جەڭىسكە جەتىپ وتىرعانىن جۇرتشىلىق جاقسى بىلەدى.
«مۇسىلمان» باتالونىن اۋعان ەلىنە بارا سالعاندا مايمەنە ايماعىندا ورنالاستى. نەگىزىنەن تاجىك، قازاق، وزبەك، قىرعىز جىگىتتەرىنەن تۇرعان باتالون اشىق الاڭداردا ۇرىسپەن، بارلاۋ جۇمىستارىمەن اينالىستى.
ال، 1982 -جىلى كەڭەس اسكەرى پانجەر شاتقالىن بوساتىپ كەتكەندە، ونى 1 اي بويى جاۋ قولىنا بەرمەۋ قارا مايوردىڭ باتالونىنا تاپسىرىلعان.
بوريس توكەن ۇلى نەبارى 500 ادامىمەن وسى ۇلكەن اڭعاردى ۇستاپ قالۋى ءتيىس بولدى. سول كەزدەگى بەلگىلى احماد شاح ماسۋد قولباسشىنىڭ اسكەرىنە تويتارىس بەرۋ وتە قيىن بولاتىن.
قارا مايوردىڭ كومانداسى 1 اي ەمەس 1 جىل بويى پانجەر شاتقالىن ۇستاپ قالۋمەن قاتار جاۋ اسكەرىنە وقتىن وقتىن سوققى بەرىپ تۇرعان.
وسى ۋاقىت ارالىعىندا ونىڭ كومانداسىنان 45 ادام كوز جۇمعان. كەيىن احمەد شاح ماسۋد قارا مايوردى ۇستاعان ادامعا 1 ميلليون افگاني تىككەن. بوريس توكەن ۇلىنىڭ باتالونى ەڭ شىعىن از باتالون دەپ سانالدى.
ونىڭ ەرلىگى اڭىزعا اينالىپ «قارا مايور» دەگەن لاقاپ اتى كۇللى ايماققا جايىلدى. «سپەتسناز گرۋ س س س ر» دەگەن كىتاپتاعى ءتىزىم بويىنشا ءتورتىنشى ورىندى نىق يەلەنگەن قازاق جىگىتىن سول كەزدەگى كەڭەستىك ساياساتتىڭ ءوزى وسىلاي جوعارى كوتەرىپ مويىنداعان. 1992 -جىلى دەنساۋلىعىنا بايلانىستى پولكوۆنيك شەنىمەن وتستاۆكاعا شىقتى. باتىر تۋرالى «قارا مايور» فيلمى ءتۇسىرىلدى.
اۆتور: گۇلميرا عوسمانالي
