اقتوعايداعى «التىن الماس» كاسىپورنى التى اي ىشىندە 700 كەلىدەن استام ساف التىن وندىرگەن
يندۋستريالاندىرۋ باعدارلاماسى بويىنشا ىسكە قوسىلعان بۇل فابريكا تولىق وندىرىستىك قۋاتىنا كوشكەن كەزدە جىلىنا 3 تونناعا دەيىن باعالى مەتالل وندىرۋگە قاۋقارلى.
تاۋداعى كەندى قوپارىپ، تاستى بورشا ۇگىتۋ وڭاي شارۋا ەمەس. مامانداردىڭ ايتۋىنشا، قيىرشىق تاستاردان ءبىر گرام التىندى اجىراتىپ الۋ ءۇشىن جارتى توننادان استام كەندى وڭدەۋ قاجەت. سول سەبەپتى كاسىپورىن تولىقتاي زاماناۋي ۇلگىدە جاراقتاندىرىلعان. باياعىداي الىپ كولىكتەر شاڭدى اسپانعا شىعارىپ كەن تاسىمايدى. ۇنتاقتاۋ كەشەنىنەن ءار ساعات سايىن 300 تونناعا جۋىق كەن كونۆەەر ارقىلى تىكەلەي فابريكاعا كەلىپ تۇسەدى. وسى جەردە دايىن ءونىم الىنادى.
يسا ەرقاسىموۆ، كاسىپورىننىڭ اعا شەبەرى - بۇل جەردە بارلىق قوندىرعىلار اۆتوماتتاندىرىلعان. قۇرىلعىنىڭ بارلىعى جاڭا، وڭتۇستىك افريكادان جەتكىزىلگەن. ءبىزدىڭ قۇيىپ جاتقان التىنىمىزدىڭ ساپاسى وتە جاقسى. 93-94 پايىز التىن سليتوكتاردا.
قۇنى 21 ميلليارد تەڭگە تۇراتىن عالامات جوبا ەلىمىزدىڭ يندۋستريالاندىرۋ باعدارلاماسى اياسىندا جۇزەگە اسقان. ايتا كەتۋ كەرەك، وبلىس ورتالىعىنان جىراقتا جاتقان اقتوعاي اۋدانىندا بۇرىن- سوڭدى مۇنداي الىپ ءوندىرىس بولعان ەمەس. تىڭ جوبا جەرگىلىكتى تۇرعىنداردىڭ جاپپاي ەڭبەككە تارتىلۋىنا جول اشتى. جاقىن ماڭداعى اۋىل- ايماقتان 600 ادام جۇمىسقا ورنالاستى. سونىڭ ءبىرى - قايرات امانجولوۆ. جاقىندا بىلىكتى ماماندار كەلىپ، وعان زاماناۋي قوندىرعىدا جۇمىس ىستەۋدىڭ قىر- سىرىن ۇيرەتكەن.
قايرات امانجولوۆ، كاسىپورىن جۇمىسشىسى - بارلىعى جاڭا تەحنيكا بولعان سوڭ بىزگە سولاردا قالاي جۇمىس ىستەۋ قاجەتتىگىن ۇيرەتتى. ايلىعى، ءبارى جاقسى. جاتىن ورنى، ءۇش مەزگىل تاماعى وزدەرىنەن. سپورت زال، تەننيس وينايتىن، تەلەديدار كورەتىن جەرلەرى بار.
كاسىپورىن تولىق وندىرىستىك قۋاتىنا شىققان كەزدە جىلىنا 3 تونناعا دەيىن ساف التىن وندىرە الادى. ال التى اي ىشىندە فابريكا 700 كەلىدەن استام باعالى مەتاللدى استاناداعى اففيناج زاۋىتىنا جىبەرگەن. ءسويتىپ ۇلتتىق قوردىڭ قورجىنىن تولتىرىپ جاتىر. ماماندار مۇنداعى كەن قورىنىڭ 10 جىلعا جەتەتىنىن ايتادى. ءبىراق گەولوگيالىق بارلاۋ جۇمىستارى ءالى دە جۇرگىزىلىپ جاتىر.
khabar.kz
