«7-20-25»: قازاقستاندىقتارعا الاياق دەلدالداردان ساق بولۋ ەسكەرتىلدى

قازاقستاننىڭ ورنىقتىلىق قورى ازاماتتاردى «7-20-25» تۇرعىن ءۇي يپوتەكالىق باعدارلاماسىنىڭ اينالاسىندا ارەكەت ەتەتىن ءتۇرلى دەلدالدار مەن كۇماندى تۇلعالارعا ساقتىقپەن قاراۋعا شاقىرادى.

- قازىرگى تاڭدا باعدارلاماعا قاتىسۋشى بانكتەردىڭ باسىم بولىگى وتىنىمدەردى قابىلداۋدىڭ تولىق ونلاين فورماتىنا كوشتى. بۇل اشىقتىقتى قامتاماسىز ەتىپ، بارشاعا بىردەي تەڭ قولجەتىمدىلىك بەردى جانە وتىنىمدەردى قاراۋ پروتسەسىنە ارالاسۋ مۇمكىندىگىن جويدى. ونلاين-كەزەك اۆتوماتتى تۇردە قالىپتاسادى، ال بانك قىزمەتكەرلەرى نەمەسە ءۇشىنشى تۇلعالار تاراپىنان قانداي ءدا بىر مانيپۋلياتسيالار تەحنيكالىق تۇرعىدان مۇمكىن ەمەس، - دەلىنگەن قور حابارلاماسىندا.

قازاقستاننىڭ ورنىقتىلىق قورى ءوزىن يپوتەكالىق بروكەر، كەڭەسشى نەمەسە دەلدال رەتىندە تانىستىراتىن «كومەكشىلەر» تاراپىنان الاياقتىق جاعدايلارىنىڭ جيىلەپ كەتكەنىن حابارلايدى.

- «7-20-25» باعدارلاماسىنىڭ تانىمالدىلىعىن پايدالانا وتىرىپ، ولار سىياقىعا كەزەكتى «جەدەلدەتۋدى»، ورىن «برونداۋدى»، نەسيەنى «ماقۇلداتۋعا كەپىلدىك بەرۋدى» نەمەسە بانكتەردىڭ ليميتتەرىن «الىپ بەرۋدى» ۇسىنادى. الايدا، بۇل جالعان قىزمەت. سەبەبى باعدارلاما اياسىندا بانكتەردىڭ ءوتىنىم قابىلداۋ پروتسەسى تولىق اۆتوماتتاندىرىلعان جانە وعان سىرتتان اسەر ەتۋ مۇمكىن ەمەس. بانكتەر دە وز قۇزىرەتى شەڭبەرىندە مۇنداي قۇقىقبۇزۋشىلىقتارمەن كۇرەس جۇرگىزۋدە. ەشكىمگە اقشا تولەمەي، ءوزىڭىز يپوتەكاعا ءوتىنىم بەرە الاسىز. بۇل تەز، تەگىن جانە دەلدالدارسىز جۇزەگە اسادى. كۇماندى دەلدالدارمەن بايلانىسقا تۇسپەۋدى جانە ولارعا اقشا بەرمەۋدى وتىنەمىز، - دەلىنگەن حابارلامادا.

قۇرىلىس كومپانيالارىنىڭ ساتۋ بولىمىندەگى جاعدايلارعا دا ەرەكشە نازار اۋدارۋ كەرەك ەكەنىن ەسكەرتتى.

- ەگەر ساتۋ مەنەدجەرلەرى سىياقى سۇراپ، پاتەر تاڭداۋعا نەمەسە يپوتەكا راسىمدەۋگە كومەك ۇسىنسا، كوپ جاعدايدا كومپانيا باسشىلىعى ءوز قىزمەتكەرلەرىنىڭ مۇنداي الاياقتىق ارەكەتتەرىنەن حابارسىز بولىپ كەلەدى. مۇنداي جاعدايلاردا تىكەلەي قۇرىلىس كومپانياسىنىڭ باسشىلىعىنا شاعىمدانۋعا بولادى.

ەگەر سىزگە قازاقستاننىڭ ورنىقتىلىق قورى اتىنان مەسسەندجەرلەردە، سونىڭ ىشىندە WhatsApp ارقىلى حابارلاما كەلسە، ونداعى سىلتەمەلەرگە وتپەڭىز. حابارلامانى جويىپ، جىبەرۋشىنى بۇعاتتاۋ ۇسىنىلادى. الاياقتار زياندى سىلتەمەلەر نەمەسە فايلدار جىبەرۋى مۇمكىن، بۇل قۇرىلعىنىڭ بۇزىلۋىنا جانە جەكە دەرەكتەردىڭ تارالۋىنا اكەلۋى ىقتيمال. قور قىزمەتكەرلەرى جەكە تۇلعالارمەن مەسسەندجەرلەر ارقىلى بايلانىسپايدى.

قور بانكتەرمەن الاياقتىق پەن سىبايلاس جەمقورلىق تاۋەكەلدەرىنىڭ الدىن الۋ ماسەلەلەرى بويىنشا تۇراقتى تۇردە ءوزارا ءىس-قيمىل جۇرگىزەدى. ەگەر ءسىز وسىنداي فاكتىلەرگە تاپ بولساڭىز، دەرەۋ قۇقىق قورعاۋ ورگاندارىنا جۇگىنۋىڭىزدى سۇرايمىز. بارلىق سۇراق بويىنشا قازاقستاننىڭ ورنىقتىلىق قورىنا حابارلاسا الاسىزدار: 77272772025+، - دەلىنگەن حابارلامادا.