تۇرعىن ءۇي «7-20-25» باعدارلاماسى بويىنشا ەڭ وزەكتى 16 سۇراققا جاۋاپ
بىرىنشىدەن، باعدارلامانىڭ رەسمي ماتىنىنە سايكەس، جاڭا يپوتەكا بويىنشا باسپانا الۋدى قالايتىندار ءتورت نەگىزگى كريتەرييگە سايكەس كەلۋى كەرەك. ۇمىتكەر قازاقستان رەسپۋبليكاسىنىڭ ازاماتى بولىپ، جەكە باسىندا ق ر اۋماعىندا وتباسىنىڭ ءار مۇشەسىنە شاققاندا 15 شارشى مەتردەن اسپايتىن جاتاقحانا بولمەلەرى مەن اپاتتى جاعدايداعى ۇيلەردەن باسقا تۇرعىن ءۇيى بولماۋى كەرەك. سونداي- اق، الەۋەتتى قاتىسۋشىنىڭ يپوتەكالىق زايەمدار بويىنشا وتەلمەگەن قارىزى بولماۋى قاجەت جانە كاسىپكەرلىك نەمەسە ەڭبەك قىزمەتىنەن تۇسەتىن تابىسىن كورسەتۋى ءتيىس.
ايتسە دە، باعدارلاما وپەراتورى بولىپ سانالاتىن ق ر ۇلتتىق بانكىنىڭ ەنشىلەس ۇيىمى - «باسپانا» حالىق تاراپىنان ەڭ ءجيى تۇسەتىن سۇراقتاردى جاريالادى. وسى ورايدا قازاقپارات باعدارلاما تۋرالى ەڭ وزەكتى سۇراقتاردىڭ جاۋابىن ءتىزىپ كوردى.
№1 سۇراق: رەسمي تابىس كوزىن كورسەتپەي- اق، باعدارلاما زايەمىن الۋعا بولا ما؟
جاۋاپ: بولمايدى، سەبەبى ءوتىنىم بەرۋشى تولەۋگە قابىلەتسىز بولىپ سانالادى.
№2 سۇراق: زايەم الۋ ءۇشىن ەڭبەكاقى (تابىس) كولەمى قانشا بولۋى قاجەت؟
جاۋاپ: باعدارلامادا ەڭ تومەنگى تابىس كولەمى كورسەتىلمەگەن. ءوتىنىم بەرۋشى قارىزدى وتەۋگە جەتكىلىكتى تابىستى كورسەتۋى كەرەك. ەگەر كورسەتىلگەن تابىس جەتكىلىكسىز بولسا، قوسالقى قارىز الۋشىنى تارتۋعا بولادى.
№3 سۇراق: جاقىن تۋىستار، كۇيەۋ نەمەسە جۇباي قوسالقى قارىز الۋشى بولا الا ما؟
جاۋاپ: بولا الادى.
№4 سۇراق: قوسالقى قارىز الۋشى رەتىندە باسپاناسى بار ادامدى شاقىرا الامىن با؟
جاۋاپ: قوسالقى قارىز الۋشىعا باعدارلاما ەش تالاپ قويمايدى. بارلىق تالاپتى « 7-20-25» باعدارلاماسى بويىنشا يپوتەكا بەرەتىن بانكتەر دەربەس بەلگىلەيدى.
№5 سۇراق: ءالى وتەلمەگەن يپوتەكالىق زايەممەن قاتار باعدارلاماعا قاتىسۋعا بولا ما؟
جاۋاپ: بولمايدى.
№6 سۇراق: وزگە يپوتەكالىق زايەم بويىنشا قوسالقى قارىز الۋشى بولا الامىن با؟
جاۋاپ: بولمايدى، سەبەبى قوسالقى قارىز الۋشى نەگىزگى قارىز الۋشىمەن بىردەي زايەم بويىنشا بورىشكەر بولىپ سانالادى.
№7 سۇراق: قانشا جاسقا دەيىن باعدارلاماعا ءوتىنىم بەرۋگە بولادى؟
جاۋاپ: باعدارلامادا جاس بويىنشا شەكتەۋلەر جوق.
№8 سۇراق: باعدارلاما بويىنشا نەسيە بەرۋ كەزىندە قارىز الۋشىنىڭ زەينەتكەرلىك جاسىنا دەيىنگى مەرزىمى ەسكەرىلە مە؟
جاۋاپ: مۇنداي جاعداي باعدارلاما ارقىلى ورناتىلمايدى. نەسيە مەرزىمىن قارىز الۋشى بانكپەن كەڭەسۋ ارقىلى بەلگىلەيدى.
№9 سۇراق: باعدارلاماعا مەملەكەتتىك قىزمەتشىلەر، اسكەري قىزمەتشىلەر، مۇگەدەكتەر مەن كوپبالالى وتباسىلار قاتىسا الا ما؟ ولارعا ارنالعان جەڭىلدىكتەر بار ما؟
جاۋاپ: باعدارلاماعا قازاقستاننىڭ بارلىق ازاماتتارى قاتىسا الادى. ەرەجە بارلىعىنا ورتاق، سوندىقتان ەشقانداي جەڭىلدىك جوق.
№10 سۇراق: قاي مەرزىمگە دەيىن قارىز الۋشى مەنشىگىندە باسپانا بولماۋى كەرەك؟
جاۋاپ: ەڭ باستىسى - ءوتىنىم بەرۋ كەزىندە تۇرعىن ءۇي بولماۋى كەرەك.
№11 سۇراق: ەرلى- زايىپتىلاردىڭ بىرىندە باسپانا بولسا، باعدارلاماعا قاتىسۋعا بولا ما؟
جاۋاپ: بولادى، باسپانانىڭ بولماۋى تۋرالى تالاپ نەسيە الۋشىعا عانا قاتىستى.
№12 سۇراق: ەرلى- زايىپتىلاردىڭ ورتاق باسپاناسى بولسا، زاەم الۋعا بولا ما؟
جاۋاپ: بولمايدى.
№13 سۇراق: ورتاق ۇلەستىك مەنشىكتە تۇرعىن ءۇي بولسا، باعدارلاما قاتىسۋشىسى بولا الامىن با؟
جاۋاپ: بولا الاسىز، سەبەبى مەنشىكتەگى ۇلەس جىلجىمايتىن مۇلىكتىڭ جەكە نىسانى بولىپ تابىلمايدى.
№14 سۇراق: مەنشىكتە جەر ۋچاسكەسى بولسا، باعدارلاماعا قاتىسۋعا بولا ما؟
جاۋاپ: تۇرعىن ءۇي قۇرىلىسى جوق جەر ۋچاسكەسى باسپانا بولىپ سانالمايدى، وسىعان بايلانىستى جەر ۋچاسكەسى بار ادام باعدارلاماعا قاتىسا الادى.
№15 سۇراق: ساتىپ الۋ قۇقىعىمەن باسپانا جالداۋ تۋرالى كەلىسىم بەكىتىپ قويعاندار زاەم الا ما؟
جاۋاپ: بانككە ءوتىنىم بەرگەن ساتتە جالدامالى پاتەر قارىز الۋشىنىڭ مەنشىگىنە وتپەگەن بولسا، زاەم الۋعا بولادى.
№16 سۇراق: باستاپقى جارناعا 20 پايىزدان ارتىق تولەم جاساۋعا بولا ما؟
جاۋاپ: جوق، باعدارلامادا 20 پايىز كولەمىندەگى باستاپقى جارنا بەكىتىلگەن جانە زاەم الۋ ءۇشىن ءبىر مەزگىلدە تولەنۋى ءتيىس. ەگەر باستاپقى جارنا ءۇشىن كوپ قاراجاتىڭىز بولسا، ۇلكەن مولشەردە جارنا تولەۋگە مۇمكىندىك بەرەتىن باسقا يپوتەكالىق ونىمدەردى پايدالانا الاسىز.
اۋدارما: ايجان سەرىكجان قىزى
