ەۋروپالىق وداق قازاقستاننىڭ «جاسىل ەكونوميكاعا» كوشۋ مودەلىن قولداۋعا 7,1 ميلليون ەۋرو بولەدى
بۇل رەتتە اتالعان بىرلەسكەن جوباعا ەۋروپالىق وداق 7,1 ميلليون ەۋرو مولشەرىندە قولداۋ كورسەتەتىن بولادى. بۇل تۋرالى ەۋروپالىق وداقتىڭ قازاقستانداعى وكىلدىگىنەن حابارلاندى.
«جاسىل ەكونوميكا مودەلىنە كوشۋ بويىنشا قازاقستاندى قولداۋ» جوباسى قازاقستاندا سۋ رەسۋرستارىن باسقارۋدى ەلدىڭ ستراتەگياسىمەن سايكەستەندىرۋگە باعىتتالىپ وتىر. قازاقستاننىڭ بۇل باعىتتاعى سەرپىنىن، سول ارقىلى بارلىق ءوڭىر ءۇشىن جول كورسەتىپ وتىرعانىن ەرەكشە قاناعات سەزىمىمەن اتاپ وتەمىن. جەتكىلىكتى مولشەردە جانە ايتارلىقتاي ساپادا سۋمەن قامتاماسىز ەتۋ ازاماتتاردىڭ، فەرمەرلەردىڭ جانە ونەركاسىپتىڭ مۇددەلەرىن تىكەلەي قوزعايدى. مەن بارلىق مۇددەلى تاراپتاردى جوبانى تولىق كولەمىندە پايدالانۋعا جانە ونى ويداعىداي ىسكە اسىرۋدا بىرلەسىپ جۇمىس ىستەۋگە شاقىرامىن» - دەدى قازاقستان رەسپۋبليكاسىنداعى ەۋروپالىق وداق وكىلدىگىنىڭ باسشىسى، ەلشى اۋرەليا بۋشەز حانىم.
ايتا كەتەرلىگى، بىرلەسكەن جاڭا جوبا ترانسشەكارالىق سۋلار ماسەلەسىنىڭ شەشىمىن ازىرلەۋگە، سونداي-اق ۇزاق مەرزىمدى ەكولوگيالىق تۇراقتىلىققا جانە قازاقستاننىڭ جان-جاقتى ەكونوميكالىق دامۋىنا جاردەمدەسە وتىرىپ، جاسىل ەكونوميكانىڭ مەنەدجەرلىك تاسىلدەرىن جەتىلدىرۋگە مۇمكىندىك جاسايتىن بولادى. بۇل پروتسەسكە ەكولوگيالىق باسقارۋدىڭ قازىرگى جۇيەسىن ەنگىزۋ جانە سۋ رەسۋرستارىن باسقارۋ پراكتيكاسى قوسىلماق. سونداي-اق جوبا شەڭبەرىندە قورشاعان ورتاعا ىقپال ەتۋدى باعالاۋ، سونداي-اق سۋ رەسۋرستارىن تۇراقتى پايدالانۋ ءۇشىن ەكونوميكالىق ىنتالاندىرۋدى باعالاۋ راسىمدەرىن كەڭەيتۋ جوسپارلانادى. مۇنداي جەتىلدىرۋلەردىڭ ناتيجەسى ەلدىڭ بارلىق تۇرعىندارى ءۇشىن نەعۇرلىم قولجەتىمدى تازا سۋ جانە ەكولولوگيالىق تۇراقتىلىق بولىپ تابىلادى.
وسىلايشا، جوبانى ەۋروپالىق وداق قارجىلاندىرادى. قارجىلاندىرۋدىڭ جالپى سوماسى 7,1 ميلليون ەۋرونى قۇرايتىن بولادى.
اۆتور: قانات مامەتقازى ۇلى
