جاراتىلىسى ەرەكشە 6 ادام

استانا. قازاقپارات - جەر بەتىندە قۇپيا قانشالىقتى كوپ بولسا، تولىق زەرتتەلمەگەن ادام اعزاسى دا سونشالىقتى سىرعا تولى. ەڭ سانالى تىرشىلىك يەسى دەپ ءبىر تۇرگە جاتقانىمەن، ءارقايسىسى ءبىر-بىرىنە ۇقسامايتىندىعىمەن بولەك.

كەي ادامدار ەرەكشە قابىلەتتەرى جانە سيرەك كەزدەسەتىن دەرتتەردىڭ اسەرىنەن ءتىپتى وزگەشەلەنەدى.

Bugin.kz پورتالى جاراتىلىسى ەرەكشە 5 ادامنىڭ ءتىزىمىن جاسادى.

سۇلتان كەسەن

سۇلتان كەسەن - گيننەستىڭ رەكوردتار كىتابىنا ەنگەن الەمدەگى ەڭ ۇزىن ادام. ونىڭ بويى 251 سانتيمەتردى قۇرايدى. سۇلتانعا ون جاسىندا گيپوفيز ىسىگى دياگنوزى قويىلعاننان كەيىن ءومىرى كۇرت وزگەرەدى. ءدال وسى سيرەك كەزدەسەتىن اۋرۋدىڭ اسەرىنەن سۇلتان وتە تەز وسە باستايدى. ءبىر جىل ساۋلەلىك تەراپيادان كەيىن ونىڭ ءوسۋىن باياۋلاتۋ مۇمكىن بولعان. ارنايى ەم اسەر ەتىپ، سۇلتاننىڭ ءوسۋى 251 مەترگە كەلگەندە توقتايدى.

بۇگىندە ول ءتۇرلى تەلەۆيزيالىق باعدارلامالارعا قاتىسىپ، باقتاشىلىقپەن اينالىسىپ كۇن كورەدى. سۇلتاننىڭ دەنەسى تىم سالماقتى بولعاندىقتان، ومىرتقاسى مۇنداي اۋىر جۇككە شىدامايدى، سوندىقتان بالداقپەن جۇرۋگە ءماجبۇر. ول 2014-جىلى سول كەزدەگى الەمنىڭ ەڭ قىسقا ادامى چاندرا دانگيمەن جولىققان بولاتىن.

ۆيم حوف

«مۇز ادام» دەگەن اتپەن تانىلعان نەمىس سپورتشىسى قاتتى سۋىققا توتەپ بەرە الاتىنىمەن ەرەكشەلەنەدى. بىرنەشە جىل بۇرىن جۇرگىزىلگەن زەرتتەۋ ونىڭ ەرەكشە تىنىس الا الاتىنىن جانە جۇيكە جۇيەسىنىڭ بەلسەندىلىگىن ارتتىرۋ ءۇشىن دەنەدەگى ادرەنالين دەڭگەيىن جوعارىلاتۋ ارقىلى دەنە تەمپەراتۋراسىن باسقارا الاتىنىن كورسەتتى.

ونىڭ ەڭ تاڭعاجايىپ جەتىستىگى فينليانديادا وتكەن مارافون، ول مۇزدى سۋدا 1 ساعات 52 مينۋت تۇرعان. سونىمەن قاتار ول تەك سپورتتىق شورتى كيىپ ەۆەرەست شىڭىنا كوتەرىلگەن. باسقالار، مىسالى، الپينيستەر ول جەرگە كوتەرىلۋ ءۇشىن جىلدار بويى دايىندالادى، ال حوفف مۇنى جالاڭاش دەرلىك جاساعان.

گارري تەرنەر

گارري تەرنەر - الەمدەگى ەڭ سوزىلمالى تەرىنىڭ يەسى. ەر ادام ءوزىنىڭ تەرىسىنىڭ ارقاسىندا گيننەستىڭ رەكوردتار كىتابىنا ەندى. كورسەتىلىمدەردىڭ بىرىندە گارري ىشىندەگى تەرىنى 16 سانتيمەترگە سوزا العان. بۇل جاعداي سيرەك كەزدەسەتىن ەلەرس-دانلوس اۋرۋى، ول بايلامداردىڭ، تەرىنىڭ جانە ىشكى اعزالاردىڭ دانەكەر تىندەرىن زاقىمدايدى. اۋرۋدىڭ العاشقى بەلگىلەرى گارريدىڭ بويىندا 4 جاسىندا پايدا بولعان. بۇگىنگى كۇنى گارري - قورقىنىشتى سيركتىڭ جۇلدىزى، ءارى تالانتتار شوۋىنىڭ، «ءبىرتۇرلى ادامدار» شوۋىنىڭ قاتىسۋشىسى. ءبىراق، گارريگە تەرىنى سوزۋ كەزىندە اباي بولۋ ماڭىزدى، ەگەر قان تامىرلارى جارىلىپ كەتسە، گارري مەرت بولۋى مۇمكىن.

ميشەل لوتيتو

ميشەل لوتيتو ⅩⅩ عاسىردا بۇكىل الەمدى ءوزىنىڭ ۆەلوسيپەدتەردى، تەلەديدارلاردى، تەمىر اربالاردى جانە ت. ب. دۇنيەلەردى جەي الاتىن ەرەكشە قابىلەتىمەن تاڭداندىردى.

عالىمداردىڭ ايتۋىنشا، بۇل جانسىز زاتتارعا تابەتتى وياتاتىن پسيحولوگيالىق جاعداي - «پيكا» دەپ اتالاتىن سيرەك اۋرۋ. ميشەل لوتيتونىڭ دەنەسىن تەكسەرگەن دارىگەرلەر ونىڭ اس قورىتۋ جۇيەسى وسىنداي ەكزوتيكالىق تاعامدارعا بەيىمدەلگەن دەپ مالىمدەدى. ميشەلدىڭ اسقازانىنىڭ شىرىشتى قاباتى قالىپتى ادامداردىكىنەن 2 ەسە قالىڭ ەكەنى بەلگىلى بولدى.

لوتيتو ماتەريالدىڭ زياندى بولۋى مۇمكىن بولسا دا، ونى تۇتىنۋدىڭ تەرىس اسەرىنەن زارداپ شەكپەگەنىن مالىمدەگەن.

ميشەل 2007-جىلى 67 جاسىندا جۇرەك تالماسىنان قايتىس بولعان.

دجەيف دەيب

دجەيف دەيب - ەرەكشە ۇلكەن قولداردىڭ يەسى. ول ۇلكەن قولدارمەن دۇنيەگە كەلگەن، بۇل ونى قاراپايىم ادامداردان ايتارلىقتاي ەرەكشەلەندىرەدى. سەبەبى، ونىڭ قولدارى دەنەسىنە پروپورتسيونالدى ەمەس. دارىگەرلەر الەمدەگى ەڭ ەرەكشە قولداردىڭ يەسىندە بىرنەشە پاتولوگيا نۇسقالارى بار دەپ كۇدىكتەنەدى:

اياق-قولداردىڭ گيگانتيزمى؛

پروتەي سيندرومى؛

ماكروديستروفيا؛

دجەيفتىڭ بىلەك ايماعى 49 سانتيمەتر، ەر ادام كوپتەن بەرى ارمرەستلينگپەن اينالىسادى ءارى ءوزىن وتە جاقسى سەزىنەتىنىن ايتادى. بۇل سپورتا ول اڭىزعا اينالىپ ۇلگەرگەن.

ەدۆارد ەرناندەس

72 سانتيمەتر بويدىڭ يەسى كولۋمبيالىق ەدۆارد نينو ەرناندەس گيننەستىڭ رەكوردتار كىتابىنان الەمدەگى ەڭ قىسقا ادام رەتىندە سەرتيفيكات العان.

ەر ادام العاش رەت 2010-جىلى عالامشارىمىزداعى ەڭ كىشكەنتاي ادام اتانعان. الايدا، كوپ ۇزاماي بۇل اتاقتى 66 سانتيمەتر بولاتىن نەپال تۇرعىنى حاگەندرا تاپا ماگار، 54 سانتيمەتر بويىمەن چاندرا دانگ العان بولاتىن.

دەگەنمەن، اراعا جىلدار سالىپ حاگەندرا مەن چاندرا قايتىس بولعان سوڭ، بۇگىندە رەكورد قايتادان ەرناندەسكە تيەسىلى بولدى.