اقمولا وبلىسىندا مال ۇرلىعىمەن اينالىسقان 6 قىلمىستىق توپ ۇستالدى
ۆەدومستۆونىڭ مالىمەتىنشە، بارىمتاشىلار استراحان، بۋراباي، ەرەيمەنتاۋ، جاقسى، زەرەندى جانە سەلينوگراد اۋداندارى اۋماعىندا جالپى قۇنى 54 ميلليوننان استام تەڭگە بولاتىن مال ۇرلاعان. ءتورت تۇلىكتى قولدى ەتۋ فاكتىلەرىنە قاتىستى 32 قىلمىستىڭ بەتى اشىلدى.
«ق ر ءى ءى م مال ۇرلىعىمەن كۇرەسۋدىڭ تيىمدىلىگىن ارتتىرۋ ءۇشىن قاتاڭ شارالاردى قولدانۋدا. وڭىرلەردە جەرگىلىكتى اتقارۋشى ورگاندارمەن، قوعامدىق قۇرىلىمدارمەن جانە تۇرعىندارمەن تىعىز بايلانىستى ورناتۋ ارقىلى ۇرلىقپەن كۇرەسۋ باعىتىندا 2019-2020-جىلدارعا ارنالعان ۆەدومستۆوارالىق باعدارلاما جۇزەگە اسىرىلۋدا»، - دەيدى ۆەدومستۆونىڭ باسپا ءسوز قىزمەتىندەگىلەر.
ماسەلەن، 2019-جىلدىڭ 30- قازانى مەن 1- قاراشاسى ارالىعىندا زەرەندى اۋدانى اۋماعىندا 124 اۆتوكولىك تەكسەرىلىپ، ەش قۇجاتسىز مال جانە ەت ونىمدەرىن تاسىمالداۋعا قاتىستى 6 وقيعا انىقتالدى.
وسىعان بايلانىستى ق ر ا ق ب ك 460-بابىنىڭ 2-بولىگى 2-تارماعى بويىنشا 6 اكىمشىلىك حاتتاما تولتىرىلدى. ونىڭ ىشىندە مال ۇرلىعىنا قاتىستى بۇرىن جاسالعان 1 اۋىر قىلمىس اشىلدى.
