استانادا 6 ميلليوننان استام گۇل وتىرعىزىلادى

اۋا رايىنىڭ قولايسىزدىعىنا بايلانىستى كوگالداندىرۋ جۇمىستارى جىلداعىدان كەش باستالۋدا. قازىر كوگالداندىرۋشىلار مەن لاندشافت ديزاينەرلەرى قىزۋ جۇمىس ۇستىندە.

 گۇل ءوسىرىپ، باپتاۋدا 15 جىلدىق تاجىريبەسى بار ماريا تساريەۆا ءوز سوزىندە: «استانانىڭ سالقىن اۋا رايىندا گۇلدەردى ساقتاۋ مەن قورعاۋ ەرەكشە كۇتىمدى تالاپ ەتەدى. جازدىق گۇلدەر ءۇشىن باستى قاجەتتىلىك كۇن شۋاعى، سوندىقتان گۇلدەردى تاڭداۋدا ەلوردانىڭ اۋا رايىن ەسكەرىپ، جاۋىن- شاشىنعا ءتوزىمدى تۇرلەرىن تاڭدايمىز»، - دەدى.

مامانداردىڭ ايتۋىنشا، قازاقستانعا گۇلدەر نەگىزىنەن ەۋروپا ەلدەرىنەن جەتكىزىلەدى جانە كوبىسى ءبىر مەزگىلدىك. سونىمەن قاتار جىل سايىن ءارتۇرلى گۇل تۇرلەرىن وتىرعىزۋ تاجىريبەسى قولعا الىنعان. استانا جىلى جايىندا ۆيولا، تاگەتەس، سينەراريا جانە تاعى باسقا 80 ءتۇرلى گۇل دايىن تۇر.

 كوگالداندىرۋ مەن گۇلدەردى ارنايى وبرازعا كەلتىرۋدە جۇزدەگەن ادامنىڭ ولشەۋسىز ەڭبەگى جاتىر. بيىلعى جىلى 120 مىڭنان اسا شارشى مەتر جەردى كوگالداندىرۋ جۇمىستارى جوسپارلانىپ وتىر. كوگالداندىرۋشى ءماريام رۋبايەۆا: «ءبىز تاڭعى 7-دەن جۇمىسقا شىعامىز، ءار كوگالداندىرۋشىنىڭ ءوزىنىڭ جاۋاپتى ۋچاسكەسى بار، وتىرعىزىپ بولعان سوڭ، كۇتىپ- باپتاۋ جۇمىستارىمەن اينالىسامىز»، - دەيدى.

 قازىر ماماندار استانانىڭ 20 جىلدىق مەرەيتويىنا ارنالعان لاندشافت ديزايندارىنىڭ سوڭعى دايىندىق جۇمىستارىن جۇرگىزۋدە.

 «لاندشافت جاساۋدا وبرازدارمەن قاتار، كولەمى جانە باسقا گۇلدەرمەن سايكەستىگى، ونىمەن قوسا ورنالاساتىن جەرى ەسكەرىلىپ، ەسەپتەلەدى»، - دەپ اتاپ ءوتتى لاندشافت شەبەرلىگى جوباسىنىڭ جەتەكشىسى گۇلنۇر يمامبەكوۆا.

استانا مەرەيتويىنا ارنالعان قالانى كوگالداندىرۋداعى ۇلكەن سىيدىڭ ءبىرى بوتانيكالىق باقتىڭ اشىلۋى دەپ كۇتىلۋدە. ماماندار مەرەكە قارساڭىندا قالا تۇرعىندارى مەن قوناقتارىنا ەرەكشە سىي ازىرلەپ جاتقاندارىن جانە ازىرگە ونىڭ قۇپيا ەكەنىن ايتتى.

اۆتور: دارىن نۇرساپار