استانادا 6 مىڭنان استام بالا قالا كوشەلەرىمەن ءجۇرىپ وتەدى
استانا. قازاقپارات - استانا قالاسىندا 1 - ماۋسىم - حالىقارالىق بالالاردى قورعاۋ كۇنى بالالار مەن جاستاردىڭ مۋزىكالىق وركەسترلەرى مەن انسامبلدەرىنىڭ شەرۋى وتەدى، دەپ حابارلايدى قازاقپارات ءتىلشىسى.
استانا قالاسىنىڭ ءبىلىم بەرۋ باسقارماسىنىڭ باسپا ءسوز حاتشىسى جازيرا اسانوۆانىڭ حابارلاۋىنشا، ءىس- شارا اياسىندا 105 ءبىلىم بەرۋ مەكەمەسىنەن 6 مىڭنان استام بالا ەلوردا كوشەلەرى مەن داڭعىلدارى ارقىلى ءجۇرىپ وتەتىنى جوسپارلانۋدا. بارابانشىلار، ۇرمەلى وركەستر جانە انسامبلدەر، اسكەري كيىم كيگەن قولداۋشى توپ، قالانىڭ جاستار جانە بالالار حورى جانە بي ۇجىمدارىنىڭ قۇرامىنداعى ورەندەر حالىقارالىق بالالاردى قورعاۋ كۇنىن وسىلاي اتاپ وتپەك.
«شەرۋدىڭ ماقساتى - «ماڭگىلىك ەل» جالپىۇلتتىق يدەياسىن ىسكە اسىرۋ جاعدايىندا ەستەتيكالىق جانە پاتريوتتىق تاربيە فاكتورى رەتىندە بالالار مەن ستۋدەنتتەردىڭ سالتاناتتى، كوشە- فەستيۆالدى شەرۋىن قولداۋ جانە دامىتۋ. ءىس- شارا استانا قالاسى اكىمدىگى عيماراتىنىڭ الدىنداعى الاڭدا باستاۋ الىپ، اباي داڭعىلى مەن كەنەسارى كوشەسىندە جالعاسىن تابادى» ، - دەلىنگەن حابارلامادا.
