67 جاستاعى ماروككولىق موتوسيكلمەن بىرنەشە ەلدى باسىپ ءوتىپ، قىزىلورداعا جەتتى
قىزىلوردا. قازاقپارات - 22 - مامىردا مارراكەش-الماتى موتوتسيكل تۋرىمەن جولعا شىققان ماروككولىق كاسىپكەر جانە ساياحاتشى ءابۋفيراسس ءابدىلعاني 11-ماۋسىم كۇنى قىزىلوردا قالاسىنا ايالدادى. Kazinform ءتىلشىسى جيھانكەزبەن جولىعىپ، سويلەستى.
Goldwig ماركالى موتوتسيكلىمەن ول ەۋروپانىڭ بىرنەشە ەلىن، تۇركيا، گرۋزيا جانە ازەربايجاندى كەسىپ وتكەن. كاسپي تەڭىزى ارقىلى قازاقستانعا جەتىپ، اقتاۋ، اقتوبە، ارال قالالارىندا بولدى.
ءار ەلدىڭ، ءار حالىقتىڭ ءوز ەرەكشەلىگى بارىن ايتقان كەيىپكەرىمىز قازاقتىڭ قوناقجايلىعىنا ءتانتى.
- قازاق اشىق-جارقىن، قيىندىقتا قالعان ادامعا كومەكتەسۋگە ۇمتىلاتىن، قولدا بارىن بولىسۋدەن ايانىپ قالمايتىن حالىق ەكەن. ءوز باسىم مۇنداي قاسيەتتى، مىسالى، ەۋروپالىقتاردىڭ بويىنان بايقامادىم، - دەدى ءابۋفيراسس ءابدىلعاني.
ارالعا بارار جولدا ەكى اياقتى كولىگى بۇزىلىپ قالعان. سول كەزدە جەرلەستەرىمىز تانىماسا دا وزىنە كومەكتەسىپ، دالادا قالدىرماعانىنا ءدان ريزا.
- موتوتسيكل مەنىڭ جولداعى سەرىگىم، دوسىم دەسەم دە ارتىق ايتقانىم ەمەس. تەحنيكا بولعاسىن اياقاستى بۇزىلىپ قالاتىن ساتتەر كەزدەسەدى. ءبىراق قۇداي مەنى ەشقاشان جالعىز قالدىرىپ كورگەن جوق. بايلانىس ۇستامايتىن جەردە دە ءساتىن سالىپ، كومەكتەسەتىن ادامداردى جولىقتىرادى. كەيبىرىمەن كەيىن جاقسى ارالاسىپ، دوس بولىپ كەتتىك، - دەدى ۆەلوساياحاتشى.
67 جاستاعى جيھانكەزدىڭ 10 نان استام كولىگى بار. سونىڭ 4 ءىن كەزەكتەسىپ پايدالانىپ ءجۇر. قالعانى ىستەن شىقسا دا ساقتاپ قويعان. ويتكەنى موتوتسيكلمەن بايلانىستى ءاربىر ەستەلىك قىمبات. شەتەلدىك جيھانكەز وسىعان دەيىن الەمنىڭ 60 تان استام ەلىن ارالاعان. بيىل ءتورتىنشى رەت ساياحاتقا شىعىپ وتىر.
ماراككەش-الماتى تۋرىندا شامامەن 10 مىڭ شاقىرىم جولدى ارتتا قالدىرىپتى. 23 كۇنى جولدا، موتوسيكل ۇستىندە وتكەن. بۇدان كەيىن تۇركىستانعا ايالداپ، تاراز ارقىلى الماتىعا جەتۋدى جوسپارلاپ وتىر.
- ۇلكەن ساياحاتقا جالعىز شىققاندى جاقسى كورەمىن. ويتكەنى وزىڭمەن ءوزىڭ بولاسىڭ، ساعان ەشكىم كەدەرگى كەلتىرمەيدى، ءوز ءتارتىبىڭدى ءوزىڭ قۇراسىڭ، - دەدى ءابۋفيراسس ءابدىلعاني.
كەيىپكەرىمىز ءاربىر ساپارىن تاسپالاپ وتىرادى. قازاقستانداعى ساپارى بويىنشا دا بەينەفيلم ءتۇسىرىپ، ەلىمىزدى ماروككودا جانە الەمدە تانىمال ەتۋگە ۇلەس قوسقىسى كەلەدى. سونداي-اق ەكى ەلدە ءتۋريزمدى دامىتىپ، ءوزارا بايلانىستى ودان ءارى دامىتۋعا ىنتالى.
نازەركە سانيازوۆا
