جاڭا جىلدا 650 كولىك ورتەلگەن

استانا. قازاقپارات - جاڭا جىل كۇنگى وقيعانى تۇركيا مەن فرانسيا حالقى ۇمىتا قويمايتىن شىعار. تۇركيادا جارىلىس بولسا، ال فرانسۋزدار جاڭا جىلدا قايتالاناتىن كورىنىسكە تاعى دا كەزىكتى.

جاڭا جىل تۇنىندە 650 اۆتوكولىك ورتەندى.

بۇل تۋرالى ەلدىڭ ىشكى ىستەر ءمينيسترى ءمالىم ەتتى. بۇل بۇرىنعى كورسەتكىشتەرگە قاراعاندا 20 پايىز تومەن. دەسەك تە، فرانسۋز بيلىگىنە قارسىلىق ءالى باسەڭسىمەي وتىر. وزدەرىنىڭ نارازىلىعىن وسىلاي بىلدىرمەك بولعان ونداعان قىلمىسكەر- بۇزاقىلار جىل سايىن وسى ارەكەتتەرىن قايتالايدى.

«بيىلعى جىلى بۇزاقىلاردىڭ تاعىلىق ارەكەتى تاعى دا قايتالاندى. راس، قىلمىستىق ءىس ازايدى. ءبىراق تۇراقتى پروتسەسكە اينالىپ كەلە جاتقان قىلمىستىڭ تاعىلىق وسى كورىنىس ءبىزدى الاڭداتادى. جاڭا جىل تۇنىندە 650 اۆتوكولىك وتقا وراندى. ال وتكەن جىلى 602 كولىكتى بۇزاقىلار ورتەپ كەتكەن بولاتىن»، - دەدى ىشكى ىستەر قىزمەتىنىڭ وكىلدەرى.

 ارينە قوعامدىق قاۋىپسىزدىكتى قامتاماسىز ەتۋ ماقساتىندا ەل بويىنشا 100 مىڭ پوليتسەي، ورتكە قارسى باسقارما مەن جاندارمدار قىزمەت ەتتى. الايدا، ولار قوعامدىق باقىلاۋدى قامتاماسىز ەتە المادى. بۇزاقىلارمەن قاقتىعىس بارىسىندا ونداعان پوليتسەيلەر جارالاندى، بىرنەشە قىلمىسكەر ۇستالدى.