قازاقستاندا بۇرىن-سوڭدى بولماعان 60 قا جۋىق ماماندىق پايدا بولدى
بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ ايتىپ بەردى، دەپ حابارلايدى قازاقپارات.
«كادر دايارلاۋ بويىنشا ەڭ باستى ماسەلە - بەرىلگەن ءبىلىمنىڭ نارىق تالابىنا سايكەس بولۋى. ونىڭ باستى شارتى - اكادەميالىق دەربەستىك. مۇنىڭ الدىندا قانداي ءپاننىڭ نەشە ساعات وقىتىلاتىنى جانە ولاردىڭ مازمۇنى مينيسترلىك ارقىلى، ياعني مەملەكەت ارقىلى رەتتەلەتىن. ال نارىق تالاپتارى تەز وزگەرىپ وتىرادى، سوندىقتان جۇيە ەسكىرىپ، ءبىلىم بەرۋ باعدارلامالارى سايكەس كەلمەيتىن، جاڭا ماماندىق اشۋ ءۇشىن 1-2 جىل كەتەتىن بولدى. ەندى ۋنيۆەرسيتەتتەرگە اكادەميالىق دەربەستىك بەرىلىپ، ولار ءبىلىم بەرۋ باعدارلامالارىن كاسىبي ستاندارتتارعا سايكەس ازىرلەيدى. ياعني، ەندى مەملەكەت ەمەس، وقۋ ورنى جۇمىس بەرۋشىلەرمەن بىرلەسە وتىرىپ، وقۋ باعدارلامالارىن رەتتەۋگە مۇمكىندىك الدى»، - دەدى ءبىلىم ءمينيسترى ۇكىمەتتىڭ بۇگىنگى وتىرىسىندا.
ونىڭ ايتۋىنشا، ەندىگى پروبلەما - نارىققا قانداي داعدىلار قاجەتتىگىن انىقتايتىن كاسىبي ستاندارتتاردىڭ جەتىسپەيتىنىندە. كوللەدجدەرگە دە اكادەميالىق دەربەستىك بەرىلىپ جاتىر. بۇعان دەيىن ستۋدەنتتەر 2-4 جىلعا دەيىن ۇزاق وقيتىن، جۇمىس بەرۋشىنىڭ تالاپتارى ەسكەرىلمەدى، مەكتەپتە وقىعان پاندەر قايتالانىپ، ءبىر عانا بىلىكتىلىك الىپ شىعاتىن. ەندى كوللەدجدەرگە كاسىپتىك ستاندارتتار نەگىزىندە وقىتۋ باعدارلاماسىن دەربەس ازىرلەپ، وقۋ مەرزىمدەرىن وزدەرى ايقىنداي الادى جانە تۇلەك ءۇش بىلىكتىلىككە دەيىن الىپ شىعادى.
«ەسكىرگەن ماماندىقتار جويىلىپ، جاڭا ماماندىقتار اشىلىپ جاتىر. مىسالى 50 گە جۋىق ەسكى ماماندىق بويىنشا ءبىز وقىتۋدى توقتاتتىق جانە تيىسىنشە 60 قا جۋىق بۇرىن-سوڭدى وقىتىلماعان ماماندىقتار اشىلعان. ساپانى قامتاماسىز ەتۋدىڭ تاعى ءبىر شارتى - ءبىلىم بەرۋ باعدارلامالارىن جاڭارتۋ. دايىن بولعان كاسىبي ستاندارتتار بويىنشا ۋنيۆەرسيتەتتەردە 4 مىڭنان استام باعدارلاما جاڭارتىلدى. بۇرىن بولماعان جاساندى ينتەللەكت، IT- مەديتسينا، تسيفرلىق زاڭگەر سياقتى 269 جاڭا باعدارلاما ەنگىزىلدى.
بۇلار «جاڭا بولاشاق ماماندىقتار اتلاسىنا» سايكەس اشىلىپ وتىر»، - دەدى اسحات ايماعامبەتوۆ.
ايتا كەتەيىك، كەلەسى وقۋ جىلى ءۇشىن جوعارى وقۋ ورىندارىنا 73 مىڭ، كوللەدجدەرگە 31 مىڭ گرانت بولىنەدى.
اۆتور: ايجان سەرىكجان قىزى
