قازاقستان رەسەيگە 60 توننا باكلاجان مەن بولگار بۇرىشىن ەكسپورتتادى
قازىرگى تاڭدا اۋداندا ەرتە ەگىلگەن 350 گەكتار كوكونىس داقىلدارى ءپىسىپ جەتىلىپ، ەگىستىك القاپتارىندا تەرىم جۇمىستارى قىزا تۇسكەن. بۇگىندە شارۋالار بولگار بۇرىشى مەن باكلاجان ءونىمىنىڭ 60 توننادان استامىن رەسەيگە جونەلتكەن. بۇل تۋرالى ماقتاارال اۋدانى اكىمىنىڭ باسپا ءسوز قىزمەتى ءمالىم ەتتى، دەپ حابارلايدى Baq.kz اقپارات اگەنتتىگى.
«ەڭ باستىسى - ەگىستىكتەن الىنعان ءونىم دەر كەزىندە ءتيىمدى باعاعا ساۋدالانىپ، ديقاندار شىعىنعا ۇشىراماۋى ءتيىس. ول ءۇشىن اۋدان اكىمدىگى تاراپىنان بارلىق كومەكتەر كورسەتىلەتىن بولادى» ، - دەيدى اۋدان اكىمى جامانتاي بەيسەنبايەۆ ەگىستىك القاپتاعى تەرىم جۇمىستارىمەن تانىسۋ بارىسىندا.
«تاحيرجان» شارۋا قوجالىعىندا بولعان اۋدان باسشىسى باكلاجان ونىمدەرىن جيناپ جاتقان ەڭبەككەرلەردىڭ جۇمىسىنا ساتتىلىك تىلەپ، ەڭبەكتەرىنىڭ جەمىسىن كورۋىن تىلەدى. شارۋا قوجالىقتىڭ ءتوراعاسى ارىستان ساپاروۆ بيىل 1 گەكتارعا باكلاجان، 1 گەكتار جەرگە جۇگەرى، 9 گەكتارعا ماقتا داقىلىن ەگىپتى. بىلتىر 1 گەكتاردان 27 توننا باكلاجان ءونىمىن العان شارۋا بيىل دا بۇل داقىلدان جوعارى ءونىم الۋدى كوزدەپ وتىر. اتالعان قوجالىق باكلاجاننىڭ 1 كەلىسىن دەلدالدارعا 300 تەڭگەدەن ساتىپ جاتىر ەكەن.
«باكلاجان - كۇندەلىكتى تۇرمىسقا وتە قاجەتتى ونىمدەردىڭ ءبىرى. قۇرامىندا دارۋمەندەر وتە كوپ. مىنە، ەگىنشىلىكتى ءارتاراپتاندىرۋدىڭ ارقاسىندا ديقاندارىمىز بۇرىن سوڭدى ەكپەگەن كوكونىستىڭ وسىنداي تۇرلەرىنە بەت بۇرا باستادى. ديقاندارىمىز وسىلايشا وتاندىق نارىقپەن قاتار، رەسەيگە باكلاجان ونىمدەرىن ەكسپورتتاۋدا» ، - دەدى جامانتاي قاناي ۇلى.
مۇنان سوڭ اۋدان اكىمى «يسرايل» شارۋا قوجالىعىنىڭ جۇمىس بارىسىمەن تانىستى. قوجالىقتىڭ ءتوراعاسى التىنبەك تورايەۆ بيىل 0,5 گەكتار جەرگە بولگار بۇرىشىن ەگىپ، العاشقى ونىمدەرىن شىعارا باستاپتى. بولگار بۇرىشىنىڭ كەلىسىن 400 تەڭگەدەن ساۋدالاۋدا. سونداي- اق، ول بيىل قيار مەن قىزاناق ەگىپ، جوعارى ءونىم الۋدى دا كوزدەپ وتىر.
ايتا كەتەيىك، بىلتىر ماقتارالدىق شارۋالار 3877 گەكتار جەرگە كوكونىس داقىلدارىن ەگىپ، 689 89 توننا ءونىم العان بولاتىن. ال بيىلعى كورسەتكىش مۇنان دا جوعارى بولادى دەگەن سەنىم بار.
