قىتايدان قازاقستانعا كيىم يمپورتى ءبىر جىلدا 5 ەسەگە جۋىق ءوستى

استانا. قازاقپارات - اعىمداعى جىلدىڭ قاڭتار- مامىر ايلارىندا قازاقستان مەن قىتاي اراسىنداعى تاۋار اينالىمى 10,7 ميلليارد ا ق ش دوللارىن قۇرادى، بۇل ءبىر جىل بۇرىنعىدان 21,6 پايىزعا ارتىق، دەپ حابارلايدى قازاقپارات Finprom.kz-كە سىلتەمە جاساپ.

تاۋار اينالىمىنىڭ باسىم بولىگىن ەكسپورت قۇراپ، ءبىر جىلدا 4,1 پايىزعا ازايىپ، 4,9 ميلليارد دوللاردى قۇرادى. جالپى، ەل ەكسپورتىندا قازاقستاننان قىتايعا ەكسپورتتىڭ ۇلەسى 15,4 پايىزدى قۇرادى. يمپورت 56,3 پايىزعا، 5,9 ميلليارد ا ق ش دوللارىنا دەيىن ءوستى. ەلدىڭ يمپورت قۇرىلىمىنداعى قىتايدىڭ ۇلەسى 24,2 پايىز قۇرادى.

بيتۋمدى مينەرالداردان الىنعان شيكى مۇناي مەن مۇناي ونىمدەرى قازاقستاننان قىتايعا جاسالاتىن ەكسپورتتىڭ نەگىزگى بولىگىن قۇرادى: 1,3 ميلليارد دوللار، بۇل وتكەن جىلمەن سالىستىرعاندا 16,4 پايىزعا از.

ەكىنشى قاتاردا تازارتىلعان مىس جانە وڭدەلمەگەن مىس قورىتپالارى (676,6 ميلليون ا ق ش دوللارى، جىلىنا مينۋس 41,9 پايىز)، ءۇشىنشى ورىندا - بەيورگانيكالىق حيميا ونىمدەرى (388,3 ميلليون ا ق ش دوللارى، جىلدىق ءوسىم - 2,4 ەسە).

سونىمەن قاتار، قازاقستان قىتايدان كيىم-كەشەك جانە باسقا دا تريكوتاج بۇيىمدارىن يمپورتتاۋعا بارىنشا قىزىعۋشىلىق تانىتتى: 441 ميلليون دوللار، بۇل ءبىر جىل بۇرىنعىدان 4,4 ەسە كوپ.

بۇدان وزگە، قىتايدان تەلەفوندار، جەڭىل اۆتوموبيلدەر، ەسەپتەۋ ماشينالارى جانە ولاردىڭ قوندىرعىلارى، سونداي-اق موتورلى كولىكتەردىڭ بولشەكتەرى مەن كەرەك-جاراقتارى ساتىپ الىندى.

بيىلعى جىلدىڭ ماۋسىم ايىندا قازاقستاندا قىتايدىڭ قاتىسۋىمەن 2,1 مىڭ كومپانيا جۇمىس ىستەدى، بۇل ءبىر جىل بۇرىنعىدان 37 پايىزعا ارتىق.

مۇنداي كومپانيالار كوتەرمە جانە بولشەك ساۋدا سەكتورىندا جۇمىس ىستەۋدى ءجون كوردى: 750 كاسىپورىن، جىلدىق ءوسىم 40,4 پايىز.

ەڭ تانىمال بەس سالاعا سونىمەن قاتار قۇرىلىس، ءوندىرىس، تاۋ- كەن ونەركاسىبى، اقپارات جانە كوممۋنيكاتسيالار كىردى.