قازاق بيدايىنىڭ گەنەتيكاسى: ونىمدىلىكتى گەكتارىنا 5 تونناعا دەيىن ارتتىرۋ ماقساتى تۇر - فوتو
اتاپ ايتقاندا، ءتورت كۇندىك سەميناردا ليۋتزي ۋينگەن بيداي گەنەتيكاسى مەن گەنوميكاسى بويىنشا مالىمەتتەردى باسقارۋ، اننا باحۋس بيداي گۇلىنىڭ گەنەتيكالىق ارحيتەكتۋراسىن زەرتتەۋ، جەتىسۋ ۋنيۆەرسيتەتى مولەكۋلالىق گەنەتيكا جانە گەنوميكا زەرتحاناسىنىڭ مەڭگەرۋشىسى قانات ەرمەكبايەۆ قازاق بيدايىنىڭ بەيىمدەلۋى مەن ونىمدىلىگىنىڭ گەنەتيكالىق باقىلاۋى بويىنشا عىلىمي زەرتتەۋلەرگە تالداۋ جاسادى.
قانات ەرمەكبايەۆتىڭ ايتۋىنشا، قازاقستان جەر كولەمى ۇلكەن بولعاندىقتان، استىق ءوندىرۋشى مەملەكەتتەردىڭ الدىڭعى قاتارىنا كىرەدى. الايدا، ۇلى بريتانيا ورتا ەسەپپەن 1 گەكتار جەردەن 10 توننا بيداي السا، قازاقستان 1 گەكتار جەردەن 1 توننا بيداي الادى.
وسى ورايدا، قازاقستانداعى بيداي ونىمدىلىگىنىڭ پوتەنسيالىن گەكتارىنا 5 تونناعا دەيىن ارتتىرۋ ماقساتى تۇر. دەمەك، قازىرگى ونىمدىلىكپەن سالىستىرعاندا 4 تونناعا دەيىن كوتەرۋ كەرەك. ال، بۇل 4 توننانىڭ 50 پايىزىنا تەحنولوگيا ارقىلى، 50 پايىزىنا گەنەتيكا جولدارى ارقىلى قول جەتكىزۋگە بولادى.
قازاق بيدايىنىڭ بەيىمدەلۋى مەن ونىمدىلىگىنىڭ گەنەتيكالىق باقىلاۋىن زەرتتەۋ جالعاسا بەرمەك.
«ءبىزدىڭ ماقساتىمىز - تابيعي ورگانيزمدى قولدانا وتىرىپ، قازاق بيدايىنا قاجەتتى گەندى ەكىنشى سورتتان الۋ»، - دەيدى حالىقارالىق سەميناردى ۇيىمداستىرۋشى دجون يننەس ورتالىعىنىڭ پروفەسسورى كريستوبال ۋاۋي.
ويتكەنى، بيدايدىڭ جاڭا ءتۇرىن جاساپ شىعارۋ ءۇشىن كەمىندە 12 جىل ۋاقىت كەتەدى.
عىلىمي الاڭدا قازاق بيدايىنىڭ گەنەتيكالىق كارتاسى، QTL كارتالاۋ، GWAS، RNA seq, بيوينفورماتيكالىق جانە گەنومدىق رەسۋرستارى تانىستىرىلدى.
بيداي گەنەتيكاسىمەن ماقساتتى تۇردە اينالىسىپ جۇرگەن عالىمدار قازاق بيدايىنان بولەك، ورتا ازيالىق بيداي گەنەتيكاسى مەن گەنوميكاسى تۋرالى دا زەرتتەۋلەرىن ورتاعا سالدى.
اۆتور
سامال قابىشەۆا