تەز ارىقتاۋ ءۇشىن توڭازىتقىشتا بولۋى كەرەك 5 ءونىم

استانا. قازاقپارات - دۇرىس تاماقتانۋ ادەتتەرىن قالىپتاستىرۋ ءۇشىن ەڭ الدىمەن ۇيگە پايدالى ونىمدەر الىپ قويۋ كەرەك.

توڭازىتقىش ەسىگىن اشقان كەزدە كوز الدىڭىزدا پايدالى ونىمدەر تۇرسا، سولاردىڭ ءبىرىن الىپ جەۋ ىقتيمالدىلىعى جوعارى بولادى. ءارقاشان ۇيىڭىزدە بولۋ كەرەك ارىقتاۋعا كومەكتەسەتىن 5 ءونىمدى ۇسىنامىز.

جۇمىرتقا

جۇمىرتقادان كوپتەگەن تاماق پىسىرۋگە بولادى. ءبىراق ارىقتاۋ ءۇشىن ونى سۋعا ءپىسىرىپ جەگەن دۇرىس. جۇمىرتقادان دايىندالعان تاڭعى اس تابەتتى باقىلاۋدا ۇستاۋعا كومەكتەسەدى. ونىڭ كالورياسى از جانە ول ۇزاققا دەيىن توقتىق سەزىمىن سىيلايدى.

كوكونىستەر

توڭازىتقىشتا كوكونىستەردىڭ بىرنەشە ءتۇرى بولۋى كەرەك. ولاردى شيكىلەي جەۋگە، سالاتقا قوسۋعا، گارنير رەتىندە قولدانۋعا، سمۋزي جاساۋعا بولادى. كوكونىستەر پورتسياعا قوسىمشا كولەم بەرەدى جانە اعزانى دارۋمەندەرمەن قانىقتىرادى.

ماۋسىمدىق جەمىس- جيدەكتەر

ءتاتتى بىردەڭە جەگىڭىز كەلگەن كەزدە پەچەنە نەمەسە شوكولاد ەمەس، ماۋسىمدىق جەمىس- جيدەكتەر جەڭىز.

سالاتقا ارنالعان ساپالى تۇزدىق

كوپشىلىك ديەتا كەزىندە مايونەز جەۋگە بولمايدى دەيدى دە، ونىڭ ورنىنا وسىمدىك مايىن قولدانادى. الايدا وسىمدىك مايلارىنىڭ كالورياسى ودان دا كوپ. ال سالاتتارعا ارنالعان دايىن تۇزدىقتاردىڭ ىشىندە كونسەرۆانتتار مەن مايلار بار. سوندىقتان سالاتقا تۇزدىقتى ءوزىڭىز دايىنداڭىز. مىسالى، سالات ءدامىن جاقسارتۋ ءۇشىن ليموننىڭ سۋىن پايدالانىڭىز. سوندىقتان ۇنەمى قول استىندا سيترۋستىلار بولۋى كەرەك.

قۇرامىندا اقۋىزى كوپ ونىمدەر

يوگۋرت، سۇزبە سەكىلدى اقۋىزعا باي ونىمدەر - پايدالى تىسكەباسارلار. اقۋىزعا باي ونىمدەر ارىقتاۋعا كومەكتەسەدى جانە ولاردان كەيىن ۇزاققا دەيىن توق جۇرەسىز.