ەلدە اۋە رەيسى 5 ساعاتقا كەشىكسە بيلەت قۇنى تولىق قايتارىلۋى ءتيىس

استانا. قازاقپارات - بىلتىر اۋە رەيستەرىنىڭ ۇزدىكسىز قاتىناۋى %76 عانا ورىندالعان. الدىڭعى جىلمەن سالىستىرعاندا كورسەتكىش كوڭىل كونشىتپەيدى.

بۇنى ازاماتتىق اۆياتسيا كوميتەتى ءتوراعاسىنىڭ ورىنباسارى مويىندادى. تيمۋر تىلەگەنوۆتىڭ ايتۋىنشا، رەيستەردىڭ كەشىگۋىن ازايتۋ ماقساتىندا ءتيىستى زاڭناماعا وزگەرتۋ ەنگىزىلگەن.

«ەسكى زاڭناماعا سايكەس، اۋە رەيسى 10 ساعاتقا كەشىكتىرىلگەن جاعدايدا اۋە كومپانياسى بيلەت قۇنى تولىق قايتارۋعا ءتيىس ەدى. وسىنداي جاعدايلاردى بولدىرماس ءۇشىن ءبىز زاڭناماعا وزگەرتۋ ەنگىزۋدى ۇسىندىق. زاڭ بىلتىرعى جىلدىڭ اياعىندا قابىلداندى. ەگەر كەشىگۋ ۋاقىتى 5 ساعاتتان اساتىن بولسا، وندا بيلەت قۇنى تولىق قايتارىلۋى ءتيىس»، دەيدى ازاماتتىق اۆياتسيا كوميتەتى ءتوراعاسىنىڭ ورىنباراسى تيمۋر تىلەگەنوۆ.

بىلتىر قازاقستاندىق جولاۋشىلاردىڭ اۋە تاسىمالى %17 ارتتى. ياعني، تاۋەلسىزدىك جىلدارىندا تۇڭعىش رەت اۋەمەن قاتىناعان جولاۋشى سانى 11 ميلليونعا جەتكەن. بۇگىندە 3 وتاندىق جانە 27 شەتەلدىك كومپانيا اۋە تاسىمالىن جۇزەگە اسىرىپ جاتىر. يندۋستريا جانە ينفراقۇرىلىمدىق دامۋ مينيسترلىگى قازاقستاننان قىتاي مەن وزبەكستانعا ۇشۋ رەيسىنىڭ سانىن ارتتىرماق. سونداي-اق، يزرايل، قاتار، ساۋد ارابياسى، ازەربايجان، تاجىكستان مەن پاكىستانعا رەيس اشپاق.

24.kz