مۇعالىمدەر 5 كۇندىك جۇمىس اپتاسىنا كوشتى

استانا. قازاقپارات – ق ر وقۋ-اعارتۋ ءمينيسترى پەداگوگتەردى بەسكۇندىك جۇمىس رەجيمىنە كوشىرۋ تۋرالى بۇيرىعى كۇشىنە ەندى، دەپ حابارلايدى قازاقپارات ءتىلشىسى.

قۇجاتتىڭ تولىق اتاۋى - «ق ر وقۋ- اعارتۋ ءمينيسترىنىڭ پەداگوگتىڭ جۇمىس ۋاقىتى مەن دەمالىس ۋاقىتى رەجيمىنىڭ ەرەكشەلىكتەرىن ايقىنداۋ قاعيدالارىن بەكىتۋ تۋرالى ق ر ءبىلىم جانە عىلىم ءمينيسترىنىڭ 2020 -جىلعى 21-ساۋىردەگى №153-بۇيرىعىنا وزگەرىستەر ەنگىزۋ تۋرالى» 2022 -جىلعى 27-قىركۇيەكتەگى № 410-بۇيرىعى.

قۇجات بويىنشا ءۇش اۋىسىمدىق وقىتۋ رەجيمىندە جۇمىس ىستەيتىن جانە ورىن تاپشىلىعى بار، تەحنيكالىق جانە كاسىپتىك، ورتا بىلىمنەن كەيىنگى ءبىلىم بەرۋ ۇيىمدارىنان باسقا مەكتەپكە دەيىنگى تاربيە جانە وقىتۋ ورىندارىندا، ورتا ءبىلىم بەرۋ ۇيىمدارىندا بەس كۇندىك جۇمىس اپتاسى بەلگىلەنەدى.

ياعني، دەمالىس كۇندەرى سەنبى مەن جەكسەنبى بولماق. ال ءۇش اۋىسىمدىق جۇيەمەن وقىتاتىن جانە ورىن تاپشىلىعى بار ورتا ءبىلىم بەرۋ ۇيىمدارىندا اپتاسىنا التى كۇن جۇمىس ىستەيتىن پەداگوگتەر ءۇشىن دەمالىس كۇنى جەكسەنبى بولادى.

بۇيرىقتا قوسىمشا ءبىلىم بەرۋ باعدارلامالارى بويىنشا شارتتىق نەگىزدە جۇمىس ىستەيتىن مەكتەپكە دەيىنگى ۇيىمداردىڭ پەداگوگتەرىنىڭ جۇمىس ۋاقىتى مەن دەمالىس رەجيمى ىشكى ءتارتىپ ەرەجەلەرىمەن بەلگىلەنەتىنى ايتىلعان.

قۇجات 1-قازاننان باستاپ كۇشىنە ەندى.

ەسكە سالساق، بۇعان دەيىن وقۋ-اعارتۋ ءمينيسترى اسحات ايماعامبەتوۆ ءبىلىم باسقارمالارى مەن رەسپۋبليكالىق ۇيىمداردىڭ باسشىلارىمەن جاڭا وقۋ جىلىنا دايىندىق ماسەلەلەرى بويىنشا كەڭەس وتكىزگەن ەدى.