مەديتسينالىق ءبىلىم گرانتتارىنىڭ سانى 5 مىڭعا دەيىن كوبەيتىلەدى
بۇل جونىندە ق ر دەنساۋلىق ساقتاۋ ءمينيسترى اجار عينيات سەناتتىڭ باسپا ءسوز الاڭىندا ايتتى، دەپ حابارلايدى قازاقپارات ءتىلشىسى.
«بۇگىنگى تاڭدا رەسپۋبليكادا 70 مىڭنان استام دارىگەر جۇمىس ىستەيدى. بۇكىل وڭىرلەردەن 3900-دەن استام دارىگەر كەرەك دەگەن ۇسىنىس بار. جىلىنا 6000-نان استام دارىگەر، سونىڭ ىشىندە 2000-نان استام كوپبەيىندى دارىگەر دايارلانادى. وسى 3900 دارىگەردىڭ ىشىندە 2000-ى - العاشقى مەديتسينالىق كومەك كورسەتەتىن ۋچاسكەلىك دارىگەرلەر. جالپى پراكتيكالىق دارىگەرلەرگە سۇرانىس كوپ. ولاردىڭ جارتىسىنان كوبى اۋىلدىق ەلدى مەكەندەرگە قاجەت»، - دەدى ۆەدومستۆو باسشىسى جۋرناليستەردىڭ ساۋالىنا بەرگەن جاۋابىندا.
مينيستر اسىرەسە قانداي ماماندار تاپشى ەكەنىن اتاپ ءوتتى.
«سونىمەن قاتار ستاتسيونارلاردا جۇمىس ىستەيتىن انەستەزيولوگ، رەانيماتولوگ دارىگەرلەر، اكۋشەر- گينەكولوگ دەيتىن دارىگەرلەرگە، پەدياتريا سالاسىندا نەوناتولوگتەرگە سۇرانىس كوپ»، - دەدى اجار عينيات. سونداي-اق، ول بۇل تاپشىلىقتى ازايتۋ ءۇشىن قانداي شارالار قولعا الىنعانىنان اقپار بەردى.
«مينيسترلىك جىل سايىن بيۋدجەتتەن گرانتپەن وقيتىنداردىڭ سانىن كوبەيتىپ وتىر.
«دەنى ساۋ ۇلت» ۇلتتىق جوباسى بويىنشا جىل سايىن گرانتتىڭ سانى كوتەرىلىپ، 5000-عا دەيىن جەتكىزىلەدى. ءقازىر ونىڭ سانى 4500-دەن جوعارى. سونىمەن بىرگە اكىمدىكتەر وزدەرى گرانت ءبولىپ وتىر. كەيىنگى كەزدە كەيبىر مەديتسينالىق ۇيىمدار ءوز ەمحانالارىنا ءوز قاراجاتى ەسەبىنەن قاجەت مامانداردى رەزەنتۋرادا دايىنداتا باستادى»، - دەدى مينيستر.
ايتا كەتەيىك، بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ بيولوگيالىق قاۋىپسىزدىگى تۋرالى» قازاقستان زاڭى قابىلداندى.
اۆتور: ەسىمجان ناقتىباي
