سولتۇستىك قازاقستاندا سوڭعى ءبىر اپتادا 5 رەت قىسقا جينالعان ءشوپ ورتەنىپ كەتتى
وبلىستىق توتەنشە جاعدايلار دەپارتامەنتى باسقارماسىنىڭ باستىعى دميتري ءراستيحيننىڭ ايتۋىنشا، وتكەن اپتادا وبلىستا قىسقى مال ازىعىنا جيناعان ءشوپتىڭ ورتەنۋىنىڭ 5 دەرەگى تىركەلگەن. سونىڭ ءبىرى 15-تامىز كۇنى شال اقىن اۋدانى بىرلىك اۋىلىندا بولدى.
«ءورت ءسوندىرۋ قىزمەتىنە بىرلىك اۋىلىنداعى قورانىڭ ءبىرى ورتەنگەندىگى جونىندە حابار ساعات 15.45 شاماسىندا تۇسكەن. قورادان شىققان جالىن ونىڭ جانىندا ءۇيىلىپ تۇرعان ءارقايسىسى 300 كەلىلىك 72 وراما شوپكە اۋىسقان. ءورت سوندىرۋشىلەر مەن جەرگىلىكتى سەرىكتەستىكتىڭ ەرىكتى ءورت ءسوندىرۋ قۇرىلىمى جالىندى تەك ساعات 21.31 مينۋتتا تولىق ءسوندىردى. جاراقاتتانعاندار مەن قازا تاپقاندار جوق. قورا مەن 21,6 توننا ءشوپ تولىق جانىپ كەتتى. ءورتتىڭ شىعۋىنا ەلەكتر جەلىلەرىنىڭ قىسقا تۇيىقتالۋى سەبەپ»، - دەيدى دميتري راستيحين.
تاعى ءبىر ءورت اققايىڭ اۋدانى تيۋمەنكا ەلدى مەكەنىندەگى سەرىكتەستىكتەردىڭ ءبىرىنىڭ قويماسىندا ءشوپتى ارتۋ كەزىندە شىققان.
«قويمادا 15 تونناداي ءشوپ بولعان، بۇل - 75 وراما. ءورتتىڭ سالدارىنان 5 توننا - 25 وراما ءشوپ جانىپ كەتتى. مۇنىڭ بارلىعى بىلتىرعى ءشوپ. تراكتوردىڭ تۇتىگىنەن ۇشقىن ۇشىپ، ءورتتىڭ شىعۋىنا سول سەبەپ بولعان. ءورتتى توقشىن ەلدى مەكەنىندە ورنالاسقان ءورت ءسوندىرۋ بەكەتى قىزمەتكەرلەرى جانە سەرىكتەستىكتىڭ ەرىكتى قۇرىلىمى ءسوندىردى»، - دەيدى اققايىڭ اۋدانى توتەنشە جاعدايلار ءبولىمىنىڭ باستىعى ەرجان ءشارىپوۆ.
مامانداردىڭ ايتۋىنشا، ءورتتىڭ شىعۋىنا كوپ جاعدايدا وتتى ابايسىز قولدانۋ سەبەپ بولىپ جاتادى.
«جاسىرىپ نە كەرەك، كەي كورشىلەر جانجالدان كەيىن كەك الۋ ماقساتىندا دا شوپكە وت قويادى. ونىڭ سالدارىن ويلامايدى. جالپى سابان- ءشوپتى ءۇيدىڭ، مونشا مەن باسقا دا شارۋاشىلىق نىساندارىنىڭ جانىنا ۇيۋگە بولمايدى. ونىڭ ەلەكتر تاراتقىشتارمەن ارا قاشىقتىعى 15 مەتر، جولعا دەيىن 20 مەتر جانە عيماراتتار مەن قۇرىلىستاردان 50 مەتر قاشىقتا ورنالاسۋى قاجەت»، - دەيدى دميتري راستيحين.
14-تامىز كۇنى س ق و- دا ءورت قاۋىپسىزدىگى ايلىعى باستالدى. ول 15-قازانعا دەيىن جالعاسپاق. ماماندار ءۇي- ءۇيدى ارالاپ، ءورتتىڭ الدىن الۋ ماقساتىندا ءتۇسىندىرۋ جۇمىستارىن جۇرگىزبەك.