قازاقپارات كۇنتىزبەسى: 5- اقپان
ەستە قالار وقيعالار
1945-جىلى الماتىدا العاشقى قازاق كونسەرۆاتورياسى اشىلدى.
2010 -جىلى ماسكەۋدە قازاقستان رەسپۋبليكاسىنىڭ رەسەي فەدەراتسياسىنداعى ەلشىلىگىنىڭ رەزيدەنتسياسىندا داڭقتى قولباسشى جانە جازۋشى باۋىرجان مومىش ۇلى تۋرالى «اڭىزعا اينالعان باتىر» كىتابىنىڭ تۇساۋكەسەرى بولدى.
جيناقتا باۋىرجان مومىش ۇلىنىڭ ماسكەۋ مۇراعاتتارىندا ساقتالعان، بۇرىن جاريالانباعان جازبالارى، سۇحباتتارى، سۋرەتتەرى، سونداي-اق مايدانگەر-دوستارى - مالىك عابدۋلليننىڭ، دميتري سنەگيننىڭ ەستەلىكتەرى بار.
2010 -جىلى نورۆەگيا كورولدىگىنىڭ تاق مۇراگەرى، حانزادا حوكون ماگنۋس استانادا قازاق- نورۆەگ SYSLAB (جۇمىسقا ورنالاستىرۋ جانە يننوۆاتسيا جۇيەلىك زەرتحاناسى) جۇمىسقا ورنالاستىرۋعا جاردەمدەسۋ ورتالىعىن اشتى. SYSLAB جوباسى 1992-جىلى نورۆەگيانىڭ «حيب- سيسلاب» كاسىپورىنىندا كىشى جانە ورتا بيزنەستىڭ ماقساتتارىن بىرىكتىرۋ ءۇشىن قۇرىلعان.
جوبانىڭ اۆتورى جانە نەگىزىن قالاۋشى - بەرگەن قالاسىنىڭ جوعارى تەحنولوگيالار ورتالىعىنىڭ ديرەكتورى يان يوحونسسەن.
ەلىمىزدە اتالعان جوبانىڭ الماتى، استانا جانە شىمكەنت قالالارىندا ورتالىقتارى بار. جوبانىڭ نەگىزگى ماقساتى - ۇزاق ۋاقىت بويى جۇمىسسىز جۇرگەن جوعارى ءبىلىمدى ماماننىڭ جۇمىسقا ورنالاسۋىنا قول ۇشىن بەرۋ.
2014 -جىلى ق ر پرەزيدەنتىنىڭ ادديس-ابەبا قالاسىندا (ەفيوپيا فەدەراتيۆتى دەموكراتيالىق رەسپۋبليكاسى)، مەحيكو قالاسىندا (مەكسيكا قۇراما شتاتتارى)، ءال-كۋۆەيت قالاسىندا (كۋۆەيت مەملەكەتى) قازاقستان ەلشىلىگىن اشۋ تۋرالى جارلىعى شىقتى.
2014-جىلى جاس شاحماتشى جانسايا ابدىمالىك فيدە رەيتىنگىندە 89-ورىنعا كوتەرىلىپ، العاش رەت الەمنىڭ ۇزدىك شاحماتشىلارىنىڭ «جۇزدىگىنە» كىردى. «جۇزدىككە» كىرگەن 14 جاسار ابدىمالىك دينارا ءسادۋاقاسوۆادان 15 ساتى العا شىعىپ، قازاقستاندا ءنومىر ءبىرىنشى شاحماتشى اتاندى.
2014 -جىلى قازاقستاننىڭ ءىرى ۋنيۆەرسيتەتى ءال-فارابي اتىنداعى قاز ۇ ۋ- عا تۇراقتى دامۋ بويىنشا «United Nation Academic Impact» (ب ۇ ۇ اكادەميالىق ىقپال) جاھاندىق حابىن باسقارۋ سەنىپ تاپسىرىلدى.
ب ۇ ۇ تاڭداۋى كەزدەيسوق ەمەس: ب ۇ ۇ- نىڭ الەمدىك مويىندالعان ون پرينتسيپتەرىن ادام قۇقىعى، ساۋاتتىلىعى، تۇراقتى دامۋ جانە قاقتىعىستاردى شەشۋگە نەگىزدەلگەن «اكادەميالىق ىقپال» باعدارلاماسىنا قاز ۇ ۋ ورتالىق ازيا ۋنيۆەرسيتەتتەرى ىشىندە ءبىرىنشى بولىپ قوسىلدى. 2015-جىلى تۇركيادا «Dünya» جەتەكشى ەكونوميكالىق گازەتىنىڭ قازاقستان رەسپۋبليكاسىنىڭ جەتىستىكتەرىنە ارنالعان «قازاقستان» اتتى ارنايى سانى جارىق كوردى. مۇندا قازاقستاننىڭ جەتىستىكتەرى تۋرالى اقپاراتتىق-انىقتامالىق ماتەريالدار مەن ماقالالار، سونىمەن قاتار ق ر پرەزيدەنتىنىڭ قازاقستان حالقىنا جولداۋىنىڭ نەگىزگى قاعيدالارى جانە «استانا-ەكسپو-2017» تۋرالى اقپاراتتار قامتىلعان.
2016 -جىلى استاناداعى ق ر ۇلتتىق مۋزەيىندە قازاق حاندىعىنىڭ 550 جىلدىعىنا ارنالعان «ماڭگىلىك اسپان استىندا» اتتى 10 سەريالى عىلىمي-تانىمدىق دەرەكتى فيلمنىڭ تۇساۋكەسەرى ءوتتى. فيلمدى قر مادەنيەت جانە سپورت مينيسترلىگىنىڭ تاپسىرىسى بويىنشا قازاق عىلىمي-زەرتتەۋ مادەنيەت ينستيتۋتى مەن «مەرگەن» ستۋدياسى ءتۇسىردى. بۇل بىرەگەي جوبا ن. نازاربايەۆتىڭ «عاسىرلار توعىسىندا» كىتابى نەگىزىندە قازاق حاندىعىنىڭ مەرەيتويىنا ارنايى دايارلاندى.
«ماڭگىلىك اسپان استىندا» فيلمىندە ەلدىڭ باستى تاريحي وقيعالارى بارىنشا قامتىلعان. فيلمنىڭ ءار سەرياسى ءوز الدىنا تۋىندى، ياعني وندا كوشپەلى حالىقتاردىڭ ەجەلگى زاماننان بەرگى دۇنيەتانىمى جايلى، الەمدىك وركەنيەت ، ۇلى جەتىستىكتەر مەن جاڭالىقتار، سونداي-اق وزگە دە قۇندىلىقتار كوپشىلىك نازارىنا ۇسىنىلىپ وتىر.
2017 -جىلى شىمكەنتتە «وڭتۇستىك» يندۋستريالدى ايماعىنىڭ عيماراتىنان تۇركيا رەسپۋبليكاسىنىڭ «Ostim» يندۋستريالدى ايماعىنىڭ وكىلدىگى اشىلدى. شەتەلدىك يندۋستريالدى ايماقتىڭ قۇرىلتايشىلار كەڭەسىنىڭ ءتوراعاسى ورحان ايدىن بۇل جۇمىستاردىڭ قوس مەملەكەت كاسىپكەرلەرى ءۇشىن دە ءتيىمدى بولارىنا سەنىم ءبىلدىرىپ، «وڭتۇستىك» يندۋستريالدى ايماعىنىڭ دا وكىلدىگى، ياعني باس كەڭسەسى تۇركيانىڭ استاناسىنان اشىلاتىنىن جەتكىزدى.
2020 -جىلى قازاقستان رەسپۋبليكاسى پارلامەنتى سەناتىنىڭ جانىنداعى كونسۋلتاتيۆتىك-كەڭەسشى ورگان بولىپ تابىلاتىن جاستار كەڭەسىنىڭ ءبىرىنشى وتىرىسى ءوتتى. كەڭەس جاستار ساياساتى سالاسىنداعى زاڭنامانى جەتىلدىرۋ ماسەلەلەرىن قارايتىن بولادى. جاستار كەڭەسى اشىق پىكىر الماسۋ، جاڭا يدەيالاردى بىرلەسىپ تالقىلاۋ جانە بايلانىس ورناتۋ كۇنىنىڭ الاڭىنا اينالادى.