شەتەلدىك كومپانيا 5 قازاقستاندىقتى ۇشاققا وتىرعىزباي قويعان: سوت تەكسەرۋدى تالاپ ەتتى

نۇر-سۇلتان. قازاقپارات - نۇر-سۇلتان قالاسىنىڭ ەسىل اۋداندىق سوتى شەتەلدىك اۋە كومپانياسىنىڭ قازاقستاننىڭ بەس ازاماتىن ۇشاق بورتىنا مىنگىزبەي قويۋ وقيعاسى بويىنشا ەگجەي-تەگجەيلى، تاۋەلسىز تەكسەرۋ جۇرگىزۋ تۋرالى ۇكىم شىعاردى، دەپ حابارلايدى قازاقپارات قالالىق سوتتىڭ رەسمي سايتىنا سىلتەمە جاساپ.

«2018-جىلدىڭ 15- قىركۇيەگىندە قازاقستاننىڭ بەس ازاماتى (ونىڭ ىشىندە ۇشەۋى - كامەلەت جاسىنا تولماعان بالالار) ىستانبۇلدان نۇر-سۇلتان قالاسىنا ۇشۋعا ءتيىس بولاتىن. الايدا، ولار ءوز رەيسىنە مىنە الماعان سوڭ قايتادان جاڭا بيلەت ساتىپ الىپ، باسقا رەيسپەن ۇشىپ كەلگەن. 2018-جىلدىڭ قازان ايىندا استانا تۇرعىنى ازاماتتىق اۆياتسيا كوميتەتىنە شاعىمدانىپ، اتالعان وقيعا بويىنشا قىزمەتتىك تەكسەرۋ جۇرگىزۋدى جانە Turkish Airlines كومپانياسىنا ايىپپۇل سالۋدى وتىنەدى. دۇرىس جاۋاپ الا الماعان قالا تۇرعىنى مەملەكەتتىك ورگاننىڭ ءىس-ارەكەتىن زاڭسىز دەپ تانۋ جونىندە سوتقا ارىزدانعان. ەسىل اۋداندىق سوتى قالا تۇرعىنىنىڭ ءوتىنىشىن قاناعاتتاندىردى»، - دەلىنگەن اۋداندىق سوتتىڭ حابارلاماسىندا.

سوت كوميتەتتىڭ بۇل ءىس-ارەكەتىن زاڭسىز دەپ تاۋىپ، الدەقايدا مۇقيات جانە وبەكتيۆتى تاۋەلسىز تەكسەرۋ جۇرگىزۋ ارقىلى جول بەرىلگەن كەمشىلىكتى جويۋ، وسىلايشا كىشكەنتاي بالالارمەن قوسقاندا 5 ازاماتتىڭ نەلىكتەن اۆيالاينەردىڭ بورتىنا جىبەرىلمەگەنىن انىقتاۋدى ۇكىم ەتتى.