تۋريستەر ءۇشىن 5 تىلدە «سويلەيتىن» قوسىمشا ازىرلەندى
ەندىگىدە ەل تۇرعىندارى قازاقستاننىڭ تاريحي-مادەني الەمى تۋرالى بەس تىلدە ماعلۇمات الا الادى. بۇل «سيفرلىق قازاقستان» باعدارلاماسى اياسىندا ازىرلەنگەن «تاريحي جول» قوسىمشاسىنىڭ ارقاسىندا مۇمكىن بولىپ وتىر.
جوبانى ش ق و اكىمدىگىنىڭ قولداۋىمەن جەكە كومپانيا ىسكە اسىرۋدا. «تاريحي جول» قوسىمشاسىندا اقپاراتتىڭ قابىلدانۋىن جاقسارتۋ ماقساتىندا تاريحي كەيىپكەرلەر ۇلگىسىندەگى شىنايىلىق كورىنىستەر ەنگىزىلگەن. سونداي-اق ۆيرتۋالدى شىنايىلىق پەن ءوڭىردىڭ كيەلى جەرلەرىندە جۇرگەندەي سەزىم تۋدىرۋ ءۇشىن 360 گرادۋستىق ۆيدەوروليكتەر ورنالاستىرىلعان. تۋريستەر قوسىمشانى ينتەرنەتى جوق اۋماقتاردا وفلاين-رەدىمدە دە پايدالانا الادى.
قوسىمشانى تۋريستىك گيد رەتىندە دە قولدانۋعا بولادى. ول بارلىق تۋريستىك نىساندار، قوناقۇيلەر، مەيرامحانالار تۋرالى «بىلەدى». اقپاراتتاردىڭ بارلىعى قازاق، ورىس، اعىلشىن، تۇرىك جانە قىتاي تىلىندە بەرىلگەن.
قوسىمشانى ازىرلەگەن كومپانيانىڭ وكىلى ايبەك المۇحامەتوۆتىڭ ايتۋىنشا، بۇل جوبا ءوڭىردىڭ ىشكى جانە سىرتقى تۋريزم سالاسىن دامىتۋعا سەپتىگىن تيگىزەدى. «سونداي-اق ءاربىر نىساننىڭ تۋريستىك الەۋەتىنە تالداۋ جاساۋعا بولادى. بۇل تۋريستەر سانى مەن سەرۆيس ساپاسىن ارتتىرۋعا ىقپال ەتپەك»، - دەيدى ول.
ايتا كەتەيىك، اتالمىش جۇيەدە بۇگىنگى تاڭدا شىعىس قازاقستاندا ورنالاسقان 40 تان استام نىسان سيفرلاندىرىلعان.
