نۇرسۇلتان نازاربايەۆ شي جينپيڭنىڭ 5 جىلداعى جۇمىسىنا باعا بەردى
«ءتوراعا شي جينپيڭمەن وتە جاقىن تانىسپىن. ءبىز جىل سايىن كەزدەسىپ، پىكىر الماسىپ وتىرامىز. ەكى ەلگە دە تىنىش ءومىر سۇرۋگە مۇمكىندىك بەرەتىن وسىنداي سەنىمنىڭ، قارىم- قاتىناستىڭ بولعاندىعىن ماقتان ەتەمىن. قىتاي ۇلكەن مەملەكەت، ال قىتاي كومپارتياسىنىڭ 19 -سەزى بۇل قىتاي ەلىنىڭ ىشىندەگى عانا ەمەس، بۇكىل الەمدىك ماڭىزعا يە وقيعا بولدى. شي جينپيڭننىڭ توراعالىعىمەن تەك 5 جىلدىڭ ىشىندە عانا ەكونوميكا 53 تريلليوننان 80 تريلليونعا دەيىن ءوستى. 19 -سەزدە العا قويىلعان ۇلتتى دامىتۋداعى قىتاي ارمانىنا قول جەتكىزۋ ماقساتىنىڭ بارلىق مەملەكەتتەر ءۇشىن ماڭىزى بار»، - دەدى ەلباسى سۇحبات بارىسىندا.
وسى رەتتە مەملەكەت باسشىسى قىتاي حالىق رەسپۋبليكاسىنىڭ كورشىسى، جاقىن دوس رەتىندە قازاقستان بۇل جوسپارلاردىڭ بارلىعىنىڭ جۇزەگە اسىرىلعانىن قالايتىندىعىن اتاپ ءوتتى.
«مەن ولاردىڭ جۇزەگە اسىرىلاتىندىعىنا سەنىمدىمىن دە. قىتاي ەرەكشەلىگىندەگى سوتسياليزم ءبىزدىڭ شىعىستىق ءدىلىمىزدى، يدەيالارىمىزدى، حالقىمىزدىڭ ويىن كورسەتەدى جانە ول سىزدەردىڭ ەلدەرىڭىزدە وتە بايىپتى ىلگەرىلەتىلگەن. بۇعان قوسا، قىتايدىڭ عىلىمي- تەحنيكالىق پروگرەستەگى جەتىستىكتەرىن، الەمدەگى ەڭ ۇلكەن تەلەسكوپ، ەڭ ۇلكەن اەروديناميكالىق قۇبىر ىسكە قوسقانىن، قورعانىس كەشەنىندە دە زور جەتىستىگى بار ەكەندىگىن ايتا الامىن. مۇنىڭ بارلىعى دا قىتايدى الەمدىك ساياساتتاعى ءىرى ويىنشى، ۇلى دەرجاۆاعا اينالدىرادى. سوندىقتان بۇل ماسەلەدە، عىلىمي-تەحنيكالىق پروگرەس ماسەلەسىندە دە ءبىز ىنتىماقتاستىقتى بەلسەندى جۇرگىزۋدەمىز. قىتاي قازاقستانعا كومەكتەسىپ، تەحنيكالىق پروگرەسس ءۇشىن ماڭىزدى نىسانداردى سالۋدا»، - دەدى قازاقستان پرەزيدەنتى.
