الماتىداعى «ۇلى دالا ويىندارى» فەستيۆالىن 5 مىڭ ادام تاماشالادى - فوتو
«سپورتتىق الماتى» باعدارلاماسىنىڭ اياسىندا وتكەن سپورتتىق شاراعا قاتىسۋشىلار سانى بويىنشا رەكوردتىق كورسەتكىشكە، 600-گە جۋىق سپورتشىعا جەتتى.
الماتى اكىمى باۋىرجان بايبەك ءوزىنىڭ قۇتتىقتاۋ سوزىندە قازاقستان پرەزيدەنتى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىندا مادەنيەت پەن جەكە ۇلتتىق كودتى ساقتاۋعا ۇلكەن نازار اۋدارعانىن ايتتى.
- «مەملەكەت باسشىسى ەلىمىز تاۋەلسىزدىككە قول جەتكىزگەن كۇننەن باستاپ ءتول قۇندىلىقتارىمىزدى ناسيحاتتاۋ ارقىلى ۇلتتىق سانانى جاڭعىرتۋدى باسىم باعىت رەتىندە ايقىنداپ بەردى. سونىڭ ارقاسىندا حالقىمىز ۇمىت بولا باستاعان تىلىمەن، وزىندىك مادەنيەتىمەن، سالت- داستۇرىمەن قايتا قاۋىشتى. مەملەكەت تاراپىنان ۇلتتىق سپورت تۇرلەرىنە، ونىڭ ىشىندە كوكپار، الامان بايگە، اۋدارىسپاق، تەڭگە ءىلۋ، جامبى اتۋ، اسىق اتۋ، توعىزقۇمالاق، قازاق كۇرەسى سىندى ايشىقتى ءىس- شارالارعا جۇيەلى تۇردە قولداۋ كورسەتىلىپ كەلەدى. بيىلعى جىلدىڭ اياعىنا دەيىن الماتى يپپودرومىندا جۇلدەلىك قورى 80 ميلليون تەڭگە بولاتىن 89 بايگە وتەدى. ءبىزدىڭ قالادا قازاق كۇرەسىنەن «الماتى بارىسى» مەن «الەم بارىسى» سايىستارىنىڭ ءوتۋى دە سپورت اۋەسقويلارى ءۇشىن ەرەكشە سىيلىق بولماق»، - دەدى باۋىرجان بايبەك.
«ۇلى دالا ويىندارى» رەسپۋبليكالىق فەستيۆالىنە قاتىسۋشىلار سپورتتىڭ 8 ءتۇرى بويىنشا سايىسقا ءتۇستى، ولاردىڭ ىشىندە، ات جارىستارى (4 ك م تاي جارىس، 7 ك م قۇنان بايگە، 13 ك م توپ بايگە، جايداق بايگەلەر، 21 ك م الامان بايگە)، كوكپار، اۋدارىسپاق، تەڭگە ءىلۋ، توعىزقۇمالاق، اسىق اتۋ، جامبى اتۋ، قازاق كۇرەسى سىندى ۇلتتىق سپورت تۇرلەرى بار.
البەتتە، كورەرمەننىڭ كوڭىلىنەن شىعىپ، شابىتتاندىرعان، جۇيرىك شاباندوزدار قاتىسقان ايتۋلى دودا - كوكپار. اقتىق بايگەدە وڭتۇستىك قازاقستان وبلىسىنىڭ «قۇلاگەر» كومانداسى مەن جامبىل وبلىسىنىڭ «اۋليەاتا» كوماندالارى ءوزارا مىقتىنى انىقتادى. جارىس ناتيجەسى بويىنشا 9:1 ەسەپپەن، وڭتۇستىك قازاقستان وبلىسىنىڭ شاباندوزدارى التىندى ولجالادى.
- جەڭىس بىزگە وڭاي بەرىلگەن جوق. ءبىزدىڭ ۇجىمنىڭ باسىم بولىگى جاس سپورتشىلار، ءبىراق، ءبىز بار كۇشىمىزدى سالىپ، كوكپاردان ون جەتىنشى قازاقستان چەمپيوناتىن جەڭدىك. وسى جىلى جاڭا ەرەجەلەر ەنگىزىلگەندىكتەن، ءبىز ءوزىمىزدىڭ ادىستەرىمىزدى قولداندىق. قازىر قازاندىقتىقتىڭ ورنىن جەردەگى شەڭبەر الماستىردى، بۇل الدە قايدا جەڭىلىرەك. بۇگىنگى مەرەكە ءۇشىن بارلىق ۇيىمداستىرۋشىلارعا دەگەن العىسىم شەكسىز. بارلىعىن ۇلتتىق سپورت تۇرلەرىمەن اينالىسۋعا شاقىرامىن، ءبىز ءارقاشان كومەكتەسۋگە دايىنبىز! - دەيدى و ق و كومانداسىنىڭ باس باپكەرى باقتىباي شىرىنقۇلوۆ.
ايتا كەتسەك، بيىلعى جۇلدەلىك قور 24 ميلليون تەڭگەنى قۇرادى. جۇلدەلى ورىن يەلەنۋشىلەرىنە اقشالاي سىيلىقتار تابىستالدى: «قۇنان بايگە» - 2 ميلليون، 1 ميلليون، 500 مىڭ، 300 مىڭ، 200 مىڭ تەڭگە، «الامان بايگە» - 4 ميلليون، 2 ميلليون، 600 مىڭ، 500 مىڭ، 300 مىڭ تەڭگە، «توپ بايگە» - 3 ميلليون، 1,5 ميلليون، 600 مىڭ، 400 مىڭ، 200 مىڭ تەڭگە، «تاي جارىس» - 300 مىڭ، 200 مىڭ، 100 مىڭ تەڭگە، «كوكپار» - 1,5 ميلليون، 1 ميلليون، 800 مىڭ تەڭگە.
نەگىزگى ويىندار مەن قاتار، فەستيۆال قوناقتارى بۇركىتتەردىڭ، اڭشىلىق تازى يتتەردىڭ، قولدان جاسالعان قولدانبالى بۇيىمداردىڭ كورمەسىن تاماشالادى. سونىمەن قاتار، قوناقتار مىڭ بۇرالعان بيشىلەردىڭ، تەاترلىق قويىلىمنىڭ، قازاقستان ەسترادا جۇلدىزدارىنىڭ قاتىسۋىمەن وتكەن كىشىگىرىم كونسەرتتىك باعدارلاماسىنا كۋا بولىپ، تاماشا اسەر الىپ قايتتى.
فەستيۆال سپورتشىلاردى ماراپاتتاۋ راسىمىمەن مارەسىنە جەتتى. قازاقستان رەسپۋبليكاسى ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان ءسوز الىپ، كەلگەن قوناقتارعا كورسەتكەن قولداۋى ءۇشىن ريزاشىلىعىن ءبىلدىردى. جەڭىمپازدار مەن جۇلدەگەرلەرگە گراموتالار، مەدالدار مەن كۋبوكتاردى ايگىلى سپورتشى جاقسىلىق ۇشكەمپىروۆ پەن قوعام قايراتكەرى بەكبولات تىلەۋحان تابىستادى.
«ۇلى دالا ويىندارى» رەسپۋبليكالىق فەستيۆالى «سپورتتىق الماتى» جوباسى اياسىندا وسىمەن ەكىنشى مارتە، الىپ شاھاردا ۇلتتىق پەن بۇقارالىق سپورتتى دامىتۋ ماقساتىندا ءوتتى.