قازاقستاندا 5 مىڭ مامان اۋىلدا جۇمىس ىستەۋدەن باس تارتتى
بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە ق ر ۇلتتىق ەكونوميكا مينيسترلىگى ەكونوميكا ينفراقۇرىلىمدارىن دامىتۋ دەپارتامەنتىنىڭ ديرەكتورى ۇلان جازىلبەك ءمالىم ەتتى.
«ديپلوممەن اۋىلعا» جوباسى ەرەجەسىنىڭ وڭتايلى شارتتارىنا قاراماستان ءبىرقاتار پروبلەمالى ماسەلەلەر بار. بەكىتىلگەن ەرەجەگە سايكەس اكىمشى، مامان جانە سەنىمدى اگەنت اراسىندا كەلىسىم جاسالادى. وعان سايكەس، مامان جۇمىس ورنى بويىنشا اتالعان ەلدى مەكەندە كەمىندە ءۇش جىل جۇمىس ىستەۋى ءتيىس. دەگەنمەن، ەڭبەك قاتىناستارىن مەرزىمىنەن بۇرىن بۇزۋ دەرەكتەرى بار. بۇل رەتتە كەلىسىمگە سايكەس، مامان وزىنە كورسەتىلگەن الەۋمەتتىك قولداۋدى، كوتەرمە جاردەماقى مەن بيۋدجەتتىك نەسيەنى تولىق كولەمدە قايتارۋعا مىندەتتى»، - دەدى ول.
ۇ. جازىلبەك ب ا ق وكىلدەرىنىڭ ساۋالىنا جاۋاپ بەرە كەلە باعدارلاما جۇزەگە اسىرلعان ساتتەن بەرى 5 مىڭ مامان كەلىسىمشارتتى بۇزعانىن ايتتى. ولار بيۋدجەتكە قايتارىلۋى ءتيىس 1 ميلليارد تەڭگەدەن استام قارجىنىڭ 911 ميلليون تەڭگەسىن وتەدى.
«مىندەتتەمەنىڭ ورىندالماۋىنىڭ نەگىزگى سەبەبى الەۋمەتتىك- وتباسىلىق جاعدايدىڭ وزگەرۋى، باسقا ەلدى مەكەنگە كوشىپ بارۋ، جۇمىس ورنىنان بوساۋى بولىپ وتىر»، - دەدى ول.
بۇعان قاراماستان اتالعان جوبانى جۇزەگە اسىرۋدىڭ ناتيجەسىندە ناقتى ناتيجەلەرگە دە قول جەتكىزىلدى. اۋىلدىق جەرلەردەگى كادرلار سانى ارتتى.
«ماسەلەن، جوبا جۇزەگە اسىرىلا باستاعاننان اۋىلدىق جەرلەرگە 46631 مامان تارتىلىپ، ولار جالپى سوماسى 9,3 ميلليارد تەڭگە كوتەرمە قارجى الدى. ال 19263 مامانعا ءۇي ساتىپ الۋعا نەمەسە سالۋعا 43,6 ميلليارد تەڭگە كولەمىندە بيۋدجەتتىك قارجى ءبولىندى»، - دەدى دەپارتامەنت باسشىسى.
ونىڭ دەرەكتەرىنە سايكەس، اۋىلدىق جەرلەرگە بارعان مامانداردىڭ باسىم بولىگى ءبىلىم (33 400 ادام)، دەنساۋلىق ساقتاۋ (9813)، مادەنيەت (1289)، سپورت (616)، الەۋمەتتىك قامتاماسىز ەتۋ (403) جانە اگروونەركاسىپ كەشەنى سالالارىندا (1110) جۇمىس ىستەيدى.
«اعىمداعى جىلى جوبا اياسىندا اۋىلدارعا 5850 مامان تارتۋ ءۇشىن بيۋدجەتتەن كوتەرمە جاردەماقىعا 2,1 ميلليارد تەڭگە، 2725 مامانعا ءۇي ساتىپ الۋعا بيۋدجەتتىك نەسيە ۇسىنۋ ءۇشىن 8,6 ميلليارد تەڭگە قاراستىرىلدى. الداعى ءۇشجىلدىق كەزەڭگە ارنالعان رەسپۋبليكالىق بيۋدجەتتى قالىپتاستىرۋ اياسىندا 2017 -جىلى 3232 مامانعا باسپانا ساتىپ الۋ ءۇشىن بيۋدجەتتىك نەسيە بەرۋگە 11 ميلليارد بيۋدجەت قارجىسى كوزدەلگەن»، - دەدى ۇ. جازىلبەك.
اۆتور: مارلان جيەمباي
