رونالدۋ مەن نەيمار ومىرىندەگى 5 سايكەستىك

استانا. قازاقپارات - بۇگىن مادريدتىك «رەال» سۇرمەرگەنى كريشتيانۋ رونالدۋ مەن كاتالوندىق «بارسەلونا» شابۋىلشىسى نەيماردىڭ تۋعان كۇنى. بۇل فۋتبولشىلار ومىرىندەگى ءبىرىنشى سايكەستىك سەكىلدى. ودان وزگە دە سايكەستىكتەر بار ەكەن.

 كەدەيلىكتەن بايلىققا.. .

 ەكى فۋتبولشى دا كەدەي وتباسىندا دۇنيەگە كەلگەن. بۇگىندە فۋتبول ارقىلى وتباسىلارىن اسقان بايلىققا كەنەلتىپ وتىر. رونالدۋ كىشكەنتاي كەزىندە «سپورتينگ» كلۋبىنىڭ اكادەمياسىندا جاتتىققان. اكادەميادا اسا تانىمال بولماعان. اناسىن ءجيى ساعىناتىن بالا رونالدۋ فۋتبولدى تاستاپ كەتكىسى دە كەلگەن. كەيىننەن اناسى ۇلىنىڭ جانىنا ۋاقىتشا قونىس اۋدارىپ، قولىنان كەلگەنشە بار جاعدايىن جاساعان.

نەيمار مادريدتىك «رەال» اكادەمياسىن ءۇيىن ساعىنىپ جۇرگەندە تاستاپ كەتكەن. سونداي- اق فۋتبولشىنىڭ اكەسى «كورولدىك كلۋب» باسشىلىعىنان ءىرى كولەمدە قارجىلاي كومەك كورسەتۋدى سۇراعان. الايدا كلۋب باسشىلىعى بۇل كەلىسىمنەن باس تارتقان سوڭ، اكەسى ۇلىن قايتا اكەلىپ «سانتوس» اكادەمياسىنا تابىستاعان.

الاڭداعى «اۋرۋلارى» ءبىر.. .

ەكى فۋتبولشى دا الاڭدا قارسىلاستارى جاناسا كەتكەندە جانۇشىرا ايقايلاپ، جەر قۇشا كەتەتىن (سيمۋليانت) ويىنشىلاردىڭ قاتارىنا جاتقىزىلادى. رونالدۋ «سپورتنگتەن» اعىلشىندىق «مانچەستەر يۋنايتەد» ساپىنا اۋىسقاننان كەيىن الاڭداعى جالعان تارتىپسىزدىگى ءۇشىن سەر الەكس فەرگيۋسون تاراپىنان تالاي رەت قاتاڭ سوگىس العان. كەيىننەن بۇل ادەتىن ازايتقان- دى. ال نەيماردىڭ الاڭدا بولماس جەردە جىعىلىپ، نەمەسە شەشۋشى ساتتە فينت جاساۋىن ارىپتەستەرىنىڭ ءوزى ءجيى سىنعا الىپ جاتادى. بىردە حاۆي برازيليالىق فۋتبولشىنىڭ جالعان تارتىپسىزدىك تانىتۋى مەن فينت جاساۋىن «قارسىلاستارىنا دەگەن قۇرمەتتىڭ جوق بولۋى» دەپ باعالاعان بولاتىن.

ەكەۋىنىڭ دە «كورىكسىز» تاس ءمۇسىنى بار.. .

 2014 -جىلى پورتۋگالدىق فۋتبولشىنىڭ تۋعان جەرى فۋنشالەدە ەسكەرتكىش اشىلدى. وعان رونالدۋدىڭ ءوزى بارىپ قاتىستى. كەيىننەن الەمدىك اقپارات قۇرالدارى تاس مۇسىن تۋرالى تالاي اقپاراتتار جاريالادى. ونىڭ كوپشىلىگى ەسكەرتكىشتىڭ رونالدۋعا ۇقسامايتىنىن، كورەر كوزگە كورىكسىز جاسالعانىن العا تارتتى.

اقپارات قۇرالدارىنىڭ جازۋى بويىنشا، نەيماردىڭ ەسكەرتكىشى دە ۇسىقىنسىز قولونەر تۋىندىلارىنىڭ قاتارىنا جاتادى. «سانتوس» كلۋبى ۇزدىك ويىنشىلارىنا ارناپ كلۋب ستاديونى ىشىنە ەسكەرتكىش ورناتقان. مەتاللدان جاسالعان «نەيماردى» سارى ءتۇستى ايدارلى شاشىنان عانا انىقتاۋعا بولادى.

 اناسىز بالا تاربيەلەپ ءجۇر.. .

 ەكى فۋتبولشىنىڭ دا بالاسى بار. رونالدۋدىڭ بالاسى بيىل 6 جاسقا تولسا، نەيماردىڭ ۇلى 5 جاسقا تولادى. ەكەۋى دە ۇلدارىنا اكە ورنىنا اكە، انا ورنىنا انا بولىپ ءجۇر. پورتۋگالدىق ويىنشى ۇلىنىڭ اناسىن ءالى كۇنگە دەيىن قۇپيا ساقتاپ كەلەدى. ال نەيمار بولسا ۇلىنىڭ اناسىن جاسىرىپ قالا العان جوق. ەكەۋى دە ۇلدارىنىڭ ءوز جولىن قۋعانىن قالايدى ەكەن.

ايتا كەتەيىك، سوڭعى ۋاقىتتا مادريدتىك «رەال» كلۋبىنىڭ پرەزيدەنتى فلورەنتينو پەرەستىڭ نەيماردى ءوز كلۋبىنا قوسۋعا نيەتتى ەكەنى تۋرالى اقپاراتتار ايتىلۋدا. نەيمار بولسا كاتالوندىق ۇجىممەن كەلىسىمشارتتى ۇزارتۋعا اسىعار ەمەس. بالكىم، رونالدۋ مەن نەيمار ءبىر كلۋبتا ويناپ تا قالار.. .

massaget.kz