الماتىداعى كىتاپ فەستيۆالىندە كەلۋشىلەرگە 5 مىڭ كىتاپ تەگىن تاراتىلدى - فوتو
اتالعان مادەني شارا اياسىندا كىتاپ جارمەڭكەلەرى، كىتاپ كورمەلەرى، كىتاپ الماسۋ، ولەڭ وقۋ جانە وتاندىق اقىن- جازۋشىلارمەن كەزدەسۋ اكسيالارى ۇيىمداستىرىلدى.
«بۇگىنگى فەستيۆالگە «الماتى قالاسىنىڭ ورتالىقتاندىرىلعان كىتاپحانا جۇيەسى» مەملەكەتتىك مەكەمەسى دە قاتىستى. كەشە ءبىز وسىندا 5000 كىتاپ الىپ كەلىپ، ارنايى الاڭدا ولاردان ءوزىنىڭ ءبىر «وقۋ زالىن» جاساعان ەدىك، ياعني كىتاپتاردان ۇستەل، ورىندىق قۇراستىردىق. مۇنى «اشىق اسپان استىنداعى كىتاپحانا» دەپ اتادىق.
ال بۇگىن ادامدار تىنباي كەلىپ، قالاعان كىتاپتارىن قۇشاق- قۇشاق ەتىپ جيناپ الىپ كەتتى. تەگىن. بۇلار نەگىزىنەن قازاق، ورىس جانە اعىلشىن تىلىندە جازىلعان كوركەم ادەبيەتتەر. ءبىزدى قۋانتاتىنى سول، كەلۋشىلەر اراسىندا جاستار كوپ. سوندىقتان، مەنىڭ ايتارىم، كىتاپقا دەگەن سۇرانىس ەشقاشاندا جوعالمايدى»، - دەدى ءوز سوزىندە «الماتى قالاسىنىڭ كىتاپحانالار جۇيەسى» مەملەكەتتىك مەكەمەسىنە قاراستى ءنومىرى №6- كىتاپحانانىڭ مەڭگەرۋشىسى ناتاليا سىچيەۆا.
سونىمەن قاتار، ول بۇل كىتاپتاردى قالالىق كىتاپحانالارعا وقىرمانداردىڭ وزدەرى اكەلىپ بەرەتىندىگىن جەتكىزدى.
«بۇل كىتاپتاردى بىزگە وقىرماندارىمىزدىڭ وزدەرى اكەلىپ بەرەدى عوي. وزدەرى وقىعان كىتاپتاردى باسقالار دا وقىسا ەكەن دەپ ۇمىتتەنەدى. ءبىز سول كىتاپتارمەن دە جۇمىس ىستەيمىز. كونەرگەن، جىرتىلعان جەرلەرى بولسا، جوندەپ رەتكە كەلتىرەمىز. باسقا وقىرماندار كەلىپ ولاردى الىپ وقي الادى. مىنە، ءبىز سول كىتاپتاردى ءبىزدىڭ كىتاپحانالار جۇيەسىنە قاراستى بارلىق 23 كىتاپحانادان جيناپ الىپ، وسى فەستيۆالگە الىپ كەلدىك. بۇل شاراعا كەلەسى جىلى دا قاتىسامىز دەگەن ۇمىتتەمىز»، - دەدى ن. سىچيەۆا.