الەمدىك جانە ءداستۇرلى دىندەر ليدەرلەرىنىڭ 5-سەزىنىڭ دەكلاراتسياسى قابىلداندى
بۇل تۋرالى بۇگىن استانادا الەمدىك جانە ءداستۇرلى دىندەر ليدەرلەرىنىڭ V سەزى قاتىسۋشىلارىنىڭ دەكلاراتسياسىن وقىپ بەرگەن ءدىنارالىق ديالوگ جونىندەگى پاپا كەڭەسىنىڭ پرەزيدەنتى كاردينال جان-لۋي توران ءمالىم ەتتى.
اتالعان قۇجاتتا اسكەري قاقتىعىستارعا قاتىسىپ جۇرگەن تاراپتاردى جانجالدى توقتاتىپ، بىتىمگە كەلىپ، كەلىسسوزدەر ارقىلى زورلىق-زومبىلىقتى دوعارۋ، بەيبىت تۇرعىنداردى قورعاۋ مەن بارشا قايشىلىقتاردى بەيبىت شەشۋ جونىندەگى كەلىسىمدى دايارلاۋعا شاقىرىلعان.
كاردينال ءوز سوزىندە سەزگە قاتىسۋشىلار ساياسي قايشىلىقتاردى شەشۋدە كۇشتىك ادىستەردەن تاباندى تۇردە باس تارتۋعا، قازىرگى زامانعى الەمدە سەنىمسىزدىكتىڭ ارتۋىن توقتاتۋعا، ءوزارا سانكتسيالاردى دوعارۋعا، سونداي-اق بەيبىتشىلىك پەن تۇراقتى دامۋ ءۇشىن رۋحاني جانە ساياسي قايراتكەرلەر اراسىندا ءوزارا ءىس-قيمىلدىڭ جاڭا تەتىكتەرىن ىزدەستىرۋگە شاقىرعانىن اتاپ ءوتتى.
سونىمەن قاتار دەكلاراتسيادا الەمدىك جانە ءداستۇرلى دىندەرگە بىردەي سىيلاستىقتى قامتاماسىز ەتۋ ماسەلەسى اتاپ وتىلگەن. مۇنىمەن قوسا وندا وشپەندىلىك پەن زورلىق-زومبىلىقتى تۋدىرۋعا باعىتتالعان ارانداتۋلارعا قارسى تۇرۋ، سونداي-اق ەكسترەميزمگە جانە لاڭكەستىككە قارسى ءىس-قيمىل بويىنشا كۇش-جىگەرگە قولداۋ جاساۋ ماسەلەسى قامتىلعان.
اتاپ ايتقاندا قاتىسۋشىلار سەزدىڭ بۇۇ- مەن، قاۋىپسىزدىك سالاسىندا حالىقارالىق ۇيىمدارمەن بۇدان ارى قارايعى ءوزارا ءىس-قيمىلىن دامىتۋعا، جاستاردىڭ ءبىلىمىن جەتىلدىرۋگە جاردەمدەسۋگە، ب ا ق- تى ءدىنارالىق وشپەندىلىكتىڭ وتىن جاعۋ ءۇشىن پايدالانۋ تاجىريبەسىن توقتاۋعا شاقىردى.
بۇدان بولەك قۇجاتتا كەدەيلىكتىڭ، اشارشىلىقتىڭ، ەپيدەميالاردىڭ، جۇمىسسىزدىقتىڭ جانە وزگە دە قاتەرلەردىڭ پروبلەمالارىن شەشۋ ءۇشىن ءدىني جانە ساياسي قايراتكەرلەردىڭ كۇش-جىگەرىن جۇمىلدىرۋ اتاپ وتىلگەن.
ايتا كەتەيىك، الەمدىك جانە ءداستۇرلى دىندەر ليدەرلەرىنىڭ كەلەسى سەزى 2018-جىلى استانادا وتەدى.
اۆتور: رۋسلان عابباسوۆ
