استانادا الەمدىك جانە ءداستۇرلى دىندەر كوشباسشىلارىنىڭ 5- سەزى وتەدى

استانا. قازاقپارات - بۇگىن استانادا الەمدىك جانە ءداستۇرلى دىندەر كوشباسشىلارىنىڭ V سەزى اشىلادى. ەكى كۇنگە جالعاساتىن كەلەلى كەڭەس «ءدىني كوشباسشىلار مەن ساياسي قايراتكەرلەردىڭ بەيبىتشىلىك جانە دامۋ جولىنداعى ديالوگى» دەگەن تاقىرىپپەن وتەدى.

فورۋم جۇمىسىنا 42 ەلدەن كەلگەن 80 نەن استام دەلەگاتسيا قاتىسادى.

V سەزد اياسىندا ەكى پلەنارلىق جانە ءتورت سەكتسيالىق وتىرىس وتەدى. القالى جيىندا ۇلتارالىق جانە كونفەسسياارالىق تاتۋلىق پەن كەلىسىمدى قامتاماسىز ەتۋ تەتىكتەرىن تالقىلاۋ جوسپارلانىپ وتىر.

سونداي-اق اعىمداعى الەمدىك جاعدايلاردى ەسەپكە الا وتىرىپ، ءدىني جانە ساياسي كوشباسشىلاردىڭ ىنتىماقتاستىعىن كۇشەيتۋ، حالىقارالىق دەڭگەيدەگى داعدارىس جاعدايلارىن تالقىلاۋ مەن ەڭسەرۋ ماسەلەسى دە جان- جاقتى قاراستىرىلادى.

 سەزگە ق ر پرەزيدەنتى نۇرسۇلتان نازاربايەۆ، ب ۇ ۇ باس حاتشىسى پان گي مۋن، سونداي-اق ە ق ى ۇ، يۋنەسكو باسشىلارى جانە وزگە دە ءتۇرلى ءدىن وكىلدەرى مەن بەدەلدى حالىقارالىق ۇيىمداردىڭ جەتەكشىلەرى قاتىسادى.

ەسكە سالا كەتسەك، ەلباسىنىڭ باستاماسىمەن قولعا الىنعان الەمدىك جانە ءداستۇرلى ءدىن كوشباسشىلارىنىڭ العاشقى سەزى 2003 -جىلى وتكەن بولاتىن. سودان بەرى ءار 3 جىلدا ءبىر رەت تۇراقتى تۇردە ۇيىمداستىرىلىپ كەلەدى.