قازاقستان دەنساۋلىق ساقتاۋ سالاسى بويىنشا 58-ورىندا تۇر

نۇر-سۇلتان. قازاقپارات - 2022-جىلعى ءبىرىنشى جارتىجىلدىقتا قازاقستان دەنساۋلىق ساقتاۋ دەڭگەيى بويىنشا Numbeo رەيتينگىنە سايكەس 96 ەل اراسىنان 58-ورىندا تۇر، - دەپ حابارلايدى Finprom.kz.

قازاقستاننىڭ دەنساۋلىق ساقتاۋ يندەكسى Health Care Index 59,89 بولعان. بۇل يندەكس نەعۇرلىم جوعارى بولسا، دەنساۋلىق ساقتاۋ دەڭگەيى سوعۇرلىم جاقسى دەگەندى بىلدىرەدى.

دەنساۋلىق ساقتاۋ يندەكسى - دەنساۋلىق ساقتاۋ جۇيەسىنىڭ جالپى ساپاسىن باعالاۋ، ونىڭ ىشىندە مەديتسينا قىزمەتكەرلەرى، جابدىقتار، قىزمەتكەرلەر، دارىگەرلەر، شىعىندار ەسەپتەلەدى. ول Numbeo ۆەب-سايتىن قولدانۋشىلارىنىڭ ساۋالنامالارى نەگىزىندە جاسالادى. بۇل يندەكستى جاساۋ ءۇشىن (ول ءاردايىم جاڭارتىلىپ وتىرادى) كەيىنگى 36 ايداعى دەرەكتەر پايدالانىلادى. جارتىجىلدىق يندەكس جىلىنا ەكى رەت جاڭارتىلادى.

بيىلعى جىلدىڭ ءبىرىنشى جارتىجىلدىعىندا 86,04 يندەكسىمەن تايۆان (ق ح ر) كوش باستاپ تۇر. دەنساۋلىق ساقتاۋ سالاسى بويىنشا ۇزدىك ءۇش ەل قاتارىنا وڭتۇستىك كورەيا (83,04) مەن جاپونيا (80,52) دا كىرگەن. دەنساۋلىق ساقتاۋ سالاسى بويىنشا ەڭ ناشار يندەكس مالتادا، وندا 38,24. ودان كەيىن ۆەنەسۋەلا (39,15) جانە بانگلادەش (41,74) تۇر.

ە ا ە و ەلدەرى اراسىندا رەسەي 59,86 يندەكسىمەن 59-ورىندا، ارمەنيا 55,74 يندەكسىمەن 72-ورىندا، ال بەلارۋس 46,14 يندەكسىمەن 92-ورىندا تۇر.