يسلام ىنتىماقتاستىق ويىندارى 58 ەلدە تىكەلەي ەفيردەن كورسەتىلەدى
ازەربايجان وسىناۋ وراسان ۇلكەن سپورتتىق ءىس-شارانى 12-22- مامىر ارالىعىندا وتكىزەدى، دەپ حابارلايدى casp-news.ru.
يسلاميادا-2017 باسپا ءسوز قىزمەتى حابارلاعانداي، ۇيىمداستىرۋ كوميتەتى ازەربايجاندا وتەتىن باكۋ-2017 يسلام ىنتىماقتاستىق ويىندارىن ءتورت قۇرلىقتاعى الەمنىڭ 58 ەلى تىكەلەي جەتكىزۋى ءۇشىن راديوحابار تاراتاتىن كومپانيالارمەن بىردەن بىرنەشە كەلىسىمگە قول قويدى.
ولاردىڭ اراسىندا يران، بانگلادەش، پاكىستان، يندونەزيا، مالايزيا، اۋعانستان، برۋنەي، مالديۆ ەلدەرىنە حابار تاراتاتىن ازيا-تىنىق مۇحيتى حابار تاراتۋ وداعى (Asia-Pacific Broadcasting Union (ABU)) بار.
سونىمەن قاتار، Radio Televizionit Shqiptar (RTSH) تەلەراديوكومپانياسى ويىنداردى تىكەلەي ەفيردەن كورسەتەتىن بولادى. سونداي-اق، بۇل جارىس قازاقستان، تۇرىكمەنستان، تاجىكستان جانە قىرعىزستان ەلدەرىندەگى كورەرمەندەردىڭ نازارىنا دا ۇسىنىلادى. بۇدان بولەك، The Arab States Broadcasting Union (ASBU) ، TV Media Sport (TVMS) ، TRT، National Communications Network (NCN) ، ATV جانە AzTV كومپانيالارىمەن كەلىسىم جاسالدى.
وسى ارقىلى تاياۋ شىعىس جانە سولتۇستىك افريكا، سۋبساحارالىق افريكا، تۇركيا، كاريب باسسەينى، ازەربايجان ەلدەرىنىڭ يسلاميادا ويىندارىن تاماشالاۋىنا مۇمكىندىك تۋدى.
الەمنىڭ تۇكپىر-تۇكپىرىندەگى جانكۇيەرلەر اشىلۋ جانە جابىلۋ سالتاناتىن، ۇزدىك سپورتتىق جارىستار مەن ماراپاتتاۋ ءراسىمىن كورسەتەتىن كۇن سايىنعى ساعاتتىق باعدارلامالاردى، تۇركيا، كامەرۋن، ماروككو، ساۋد ارابياسى، ومان، پالەستينا، الجير مەن ازەربايجان كوماندالارىنىڭ اراسىندا وتەتىن بارلىق 16 فۋتبول ماتچىن، ويىنداعى ەڭ قىزىقتى ساتتەردى ۇسىناتىن ەكى ساعاتتىق باعدارلامانى تىكەلەي ەفيردەن كورەتىن بولادى.
«الەمنىڭ 4 قۇرلىعىنداعى 58 ەلدە تۇرىپ جاتقان 1,5 ميلليارد كورەرمەنگە ويىندى تىكەلەي ەفيردەن كورسەتۋ ارقىلى ءبىز ادامداردىڭ يسلام ىنتىماقتاستىعى سپورت فەدەراتسياسىنا مۇشە 57 ەلدىڭ ۇزدىك سپورتشىلارىنىڭ باسىن ءبىر جەرگە قوساتىن وسىنداي عالامات حالىقارالىق سپورتتىق ءىس-شارانىڭ ءبىر بولشەگى بولۋىنا مۇمكىندىك بەرەمىز»، - دەپ مالىمدەدى باكۋ-2017 ويىندارى كوميتەتىنىڭ باس وپەراتسيالىق ديرەكتورى مايك لويند.
