قازاقستان ازاماتتىعىن 587 شەتەلدىك الادى

«قازاقستان ازاماتتىعىن الۋعا جانە قازاقستان ازاماتتىعىنان شىعۋعا بەرىلگەن ارىزداردى قارايمىز. قۋانتارلىعى، قازاقستان ازاماتى بولعىسى كەلەتىن ادامداردىڭ قاتارى جىلدان جىلعا ارتىپ كەلە جاتىر. اتالعان جايت قازاقستاننىڭ ازاماتتىق ينستيتۋتىنىڭ حالىقارالىق بەدەلى جوعارىلىعىن، مەملەكەتتىڭ الەۋمەتتىك- ەكونوميكالىق جۇيەسىنىڭ تۇراقتىلىعىن، ەتنوسارالىق قارىم- قاتىناس مادەنيەتىنىڭ دامىعاندىعىن ايعاقتايدى»، - دەدى مەملەكەتتىك حاتشى.
وسى رەتتە گۇلشارا ءابدىقالىقوۆا بۇل ەلباسى نۇرسۇلتان نازاربايەۆ ۇسىنعان ۇزاقمەرزىمدى «قازاقستان-2050» ستراتەگياسىنىڭ جۇيەلى جۇزەگە اسىرىلۋىنىڭ ارقاسىندا مۇمكىن بولىپ وتىرعانىن باسا ايتتى.
«ءبىز جاڭا قازاقستاندىقتارعا ءىلتيپاتىمىزدى ءبىلدىرىپ، باقىتتى ءومىر تىلەيمىز جانە ولاردىڭ ەندى ءوز وتانى بولىپ سانالاتىن ەلىمىزدىڭ يگىلىگى جولىندا ءتيىمدى ەڭبەك ەتۋلەرىنە نيەتتەستىك بىلدىرەمىز. ەلىمىزدىڭ لايىقتى ازاماتتارىنا اينالا وتىرىپ، ولار تاۋەلسىز قازاقستاننىڭ بۇدان ارى دامۋىنا ءوز ۇلەسىن قوساتىنىنا سەنىمدىمىز»، - دەدى ول.
وتىرىستا قازاقستان ازاماتتىعىنا قابىلداۋ جانە ودان شىعارۋ ماسەلەلەرى قاراستىرىلدى. ناتيجەسىندە مەملەكەت باسشىسى ءتيىستى جارلىققا قول قويعاننان كەيىن تاياۋ جانە الىس شەتەلدەردەن كەلگەن ءارتۇرلى ەتنوستاردىڭ 587 وكىلى ەلىمىزدىڭ ازاماتتىعىن الاتىن بولادى.
كوميسسيا وتىرىسىنىڭ قورىتىندىسى بويىنشا ءتيىمدى شەشىمدەر مەن ۇسىنىمدار قابىلداندى.
اۆتور: مارلان جيەمباي