ەلباسى: ە ا ە و ەلدەرىنىڭ ساۋدا اينالىمى 55 ميلليارد دوللارعا جەتتى
بۇل تۋرالى جوعارى ەۋرازيالىق ەكونوميكالىق كەڭەستىڭ قۇرمەتتى ءتوراعاسى، قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆ ايتتى.
«29 -مامىردا ەۋرازيالىق ەكونوميكالىق وداق تۋرالى كەلىسىمشارتقا ءبىزدىڭ ەلدىڭ استاناسىندا قول قويعانىمىزعا 7 جىل تولادى. بۇگىندە بىرلەسىپ كۇش جۇمساۋدىڭ ارقاسىندا ە ا ە و الەمنىڭ ەكونوميكالىق ارحيتەكتۋراسىنان جۇيەلى ورىن العانىن اسىرەلەۋسىز ايتۋعا بولادى. سوڭعى بەس جىلدا ەلدەرىمىزدىڭ ءوزارا ساۋداسى 21 پايىزعا ءوسىپ، 2020 -جىلى 55 ميلليارد دوللارعا جەتتى. بۇل - داعدارىس جاعدايىنداعى كورسەتكىش. ايتپەسە ءبىز ودان دا ۇلكەن جەتىستىكتەرگە جەتە الامىز»، - دەدى ەلباسى جوعارى ەۋرازيالىق ەكونوميكالىق كەڭەستىڭ وتىرىسىندا.
نۇرسۇلتان نازاربايەۆ پاندەميا جاعدايىندا وداق اياسىنداعى بايلانىستاردىڭ بەرىكتىگى سىناقتان ءوتىپ جاتقانىن ەسكە سالدى.
«كوروناۆيرۋس پاندەمياسىمەن كەلگەن ەكونوميكالىق داعدارىس ءبىزدىڭ ينتەگراتسيالىق بىرلەستىگىمىزدىڭ بەرىكتىگىنىڭ سىناعىنا اينالدى. قاۋىپسىزدىك ماسەلەسى ءبىرىنشى ورىنعا شىعىپ وتىر. بۇل ازىق- تۇلىك، ءدارى- دارمەك، سيفرلىق جانە قارجىلىق ينفراقۇرىلىم سياقتى بىرنەشە سالانىڭ كەڭ اۋقىمىن قامتيدى»، - دەدى ەلباسى.
اۆتور: ەسىمجان ناقتىباي
