الماتىدا قازاق حاندىعىنىڭ 550 جىلدىعىنا ارنالعان قۋىرشاق كورمەسى اشىلدى
كەلۋشىلەر نازارىنا قازاقستان، رەسەي جانە ا ق ش- تىڭ سۋرەتشى- قۋىرشاقشىلارىنىڭ، سونداي-اق «ۇماي» كوركەمونەر مەكتەبى وقۋشىلارىنىڭ جۇمىستارى ۇسىنىلدى. اتالمىش كورمە مىسىردىڭ قازاقستانداعى ەلشىلىگىنىڭ قولداۋىمەن ۇيىمداستىرىلدى.
«بارلىعى 25 شەبەردىڭ 32 قۋىرشاعى قويىلدى. ولار شىعىس تۋرالى وزدەرىنىڭ ىشكى ۇعىمدارىن وسى قۋىرشاقتار ارقىلى بەرە بىلگەن. سونىمەن قاتار كورمە اياسىندا ونەردىڭ وسى باعىتى بويىنشا سۋرەتشىلەر شەبەرلىك سىنىپتارىن وتكىزەدى»، - دەدى ۇيىمداستىرۋشىلاردىڭ ءبىرى، «قۋىرشاقتار الەمى» ورتالىعىنىڭ جەتەكشىسى لاريسا سولوگۋب.
«ءبىز وسىنداي شارا وتكىزۋدى شامامەن وسىدان جارتى جىل بۇرىن ويلاستىرا باستادىق. سۋرەتشىلەردىڭ شىعارماشىلىعى، دالىرەك ايتقاندا، قۋىرشاقتار ارقىلى اۆتورلاردىڭ شىعىستى، «ۇلى جىبەك جولىن» قالاي كوز الدارىنا كەلتىرگەندىكتەرىن كورسەتكىمىز كەلدى. ءسويتىپ، كورمەنى قازاق حاندىعىنىڭ 550 جىلدىعىمەن ورايلاستىردىق»، - دەدى مىسىر اراب رەسپۋبليكاسىنىڭ الماتىداعى باس كونسۋلدىعىنىڭ مادەنيەت جانە ءبىلىم ىستەرى بويىنشا اتتاشەسى حەمدان يبراگيم.
ايتا كەتەلىك، كورمە ءال-فارابي اتىنداعى قازاق ۇلتتىق ۋنيۆەرسيتەتىنىڭ شىعىستانۋ فاكۋلتەتىنىڭ عيماراتىندا ءوتىپ جاتىر. ول 28- قازانعا دەيىن سوزىلادى.
اۆتور: جاپپاربەرگەن ايبوتا
