قازاق حاندىعىنىڭ 550 جىلدىعى: الماتى وبلىسىنىڭ ساۋلەتشىلەرى تاراز قالاسىنا ەرەكشە سىي جاسادى
اتاپ ايتقاندا 50 مەترلىك الىپ بارەلەف پەن قازاقتىڭ اتاقتى جىر الىبى جامبىل جابايەۆتىڭ ەسكەرتكىشىنە جاسالعان كۇردەلى جوندەۋ جۇمىستارىنان كەيىن رەڭى جاراسقان تۋىندىلار قالانىڭ كوركىن كەلتىرۋدە. بۇل تۋرالى الماتى وبلىسى اكىمىنىڭ باسپا ءسوز قىزمەتىنەن حابارلادى.
جامبىل وبلىسىنىڭ تۇرعىندارىنا تارتۋ ەتىلگەن ەرەكشە سىيدىڭ العاشقىسى جىر الىبى جامبىل جابايەۆتىڭ ەسكەرتكىشىنە جاسالعان كۇردەلى جوندەۋ جۇمىستارى بولدى. ءمۇسىننىڭ قۇرىلىسىن قازاقستان رەسپۋبليكاسىنىڭ قۇرمەتتى ساۋلەتشىسى قازىبەك جارىلعاپوۆتىڭ باسشىلىعىمەن قازاقستان رەسپۋبليكاسى ساۋلەتشىلەر جانە قالاقۇرىلىس وداعىنىڭ مۇشەلەرىنەن قۇرىلعان توپ جۇرگىزدى. نىساننىڭ قۇرىلىس جۇمىستارىنا 23,6 ميلليون تەڭگە قاراجات جۇمسالدى.
سونداي-اق جەتىسۋلىقتار تاراز قالاسىنداعى شاحريستان بازارى اركاسىنىڭ ەكى جاعىنا بيىكتىگى 2 مەتر، ۇزىندىعى 50 مەترلىك بارەلەف قابىرعاسىن ورناتىپ بەردى.
بارەلەف قابىرعاسى ءتورت نەگىزگى تاقىرىپتان قۇرالعان. اتاپ ايتقاندا:
ءبىرىنشى بولىگىندە قازاق تاريحىنىڭ باستاۋى رەتىندە «التىن ادام» بەينەسى؛
ەكىنشى بولىگىندە قازاق حالقىنىڭ مەملەكەتتىلىگىنىڭ باستاۋىن اسپەتتەيتىن، قازاق حاندىعىنىڭ نەگىزىن قالاعان جانىبەك پەن كەرەي حانداردىڭ بەينەسى؛
ءۇشىنشى بولىگىندە ەلىمىزدىڭ باس قالاسى - استانا مەن ەلباسى نۇرسۇلتان نازاربايەۆتىڭ بەينەسى؛
ءتورتىنشى بولىگىندە جامبىل جابايەۆ پەن ونىڭ «لەنينگرادتىق ورەنىم» اتتى ولەڭى بەينەلەنگەن.
نىساننىڭ قۇرىلىسىن س. ابديروۆتىڭ باسشىلىعىمەن «ۆيبرو-تاس» ج ش س جۇرگىزدى. جۇمسالعان قاراجات قۇنى 50 ميلليون تەڭگە.
بارلىق جۇمىستار دەمەۋشىلەردىڭ قاراجاتىنا ورىندالدى.
بۇل يگى ءىستىڭ بارلىعىن قالاعا جاسالعان سىي قۇرمەتتىڭ نىشانى دەپ قابىلداۋعا بولادى.
ەستەرىڭىزگە سالا كەتسەك، قازاق حاندىعىنىڭ 550 جىلدىق مەرەيتويىنىڭ اتالىپ وتىلۋىنە بايلانىستى الماتى وبلىسىنىڭ ءسۇيىنباي اتىنداعى فيلارمونياسىنىڭ ەڭ ۇزدىك جەزتاڭداي انشىلەرى مەن شىعارماشىلىق ۇجىمدارى، بيكەن ريموۆا اتىنداعى وبلىستىق دراما تەاترىنىڭ اكتەرلەرى، بەينەلەۋ ونەرى مەن قولدانبالى ونەر شەبەرلەرى، ءتۇرلى اسپاتا وينايتىن مۋزىكانتشىلار، الماتى وبلىسىنىڭ قوعام قايراتكەرلەرى مەن تىلشىلەرى تاراز قالاسىنداعى شارالارعا ۇلكەن ىنتىزارلىقپەن ات سالىسۋدا.
باستى ماقسات - وبلىس تۇرعىندارى مەن قوناقتارىنا وشكەندى جاندىرىپ، ۇمىت قالعاندى ءتىرىلتىپ، تاريحىمىز بەن ءتۇپ تامىرىمىزدى جاڭعىرتىپ-ۇلىقتار مەرەكەلىك كوڭىل كۇي مەن ەستە قالار اسەر سىيلاۋ.
