قازاق حاندىعىن 550 جىلدىعىن ۇلتتىق ۇلان جاۋىنگەرلەرى دە اتاپ وتۋدە - فوتو
بۇل تۋرالى ق ر ۇ ۇ «وڭتۇستىك» وڭىرلىك قولباسشىلىعى قوعاممەن بايلانىس جونىندەگى وفيتسەرى دارحان مۇقانوۆ حابارلادى.
بۇگىن ۇلتتىق ۇلان باستاماسىمەن «نۇر وتان» پارتياسى الماتى قالالىق فيليالىمەن بىرلەسكەن «قازاق مەملەكەتتىلىگىنە 550 جىل. ۇلتتىق ۇلان جەكە تۇلعانىڭ، قوعام مەن مەملەكەت قاۋىپسىزدىگىنىڭ كۇزەتىندە» اتتى دوڭگەلەك ۇستەل ءوتتى. دوڭگەلەك ۇستەلگە قوعام قايراتكەرلەرى، تاريحشى عالىمدار، مەملەكەتتىك، قوعامدىق ۇيىم وكىلدەرى قاتىستى.
جيىنعا قاتىسۋشىلارعا ۇلتتىق ۇلان باس قولباسشىسىنىڭ تاربيە جانە الەۋمەتتىك- قۇقىقتىق جۇمىس جونىندەگى ورىنباسارى پولكوۆنيك مۇحومەتقالي ساتوۆ اسكەر باس قولباسشىسى اتىنان ريزاشىلىق ءبىلدىرىپ، العىس ايتتى.
ونىڭ پىكىرىنشە، مۇنداي شارانى ۇيىمداستىرۋداعى باستى ماقسات وفيتسەرلەردىڭ كاسىبي دەڭگەيىن ارتتىرۋ، اسكەري ءتارتىپتى نىعايتۋ بولىپ وتىر.
«بيىلعى جىل ەرەكشە وقيعالارعا تولى. ونىڭ ىشىندە قازاق مەملەكەتتىلىگىنىڭ قالىپتاسۋىنىڭ 550 -جىلدىعىن تويلاعالى وتىرمىز. قازاقستان بارلىق تۇرعىدان العاندا دەربەستىگىن العان مەملەكەت. ءبىز قايدان شىققانىمىزدى، اتا- بابامىزدىڭ ەرلىگىن ۇمىتپاۋىمىز كەرەك. ولارعا ساي بولۋىمىز ابزال. اسكەر مەملەكەتتى قورعاۋدا ءاردايىم باستى ءرول اتقاردى. تاريحقا ۇڭىلسەك، قانشا رەت قازاق باتىرلارى ءتۇرلى قيىندىقتى باسىنان كەشىردى. گۆارديانىڭ مىندەتى ىشكى قاۋىپسىزدىكتى قامتاماسىز ەتىپ، ەلدى سىرتقى شابۋىلدان قورعاۋ. ءبىز ءاردايىم حالىققا قىزمەت ەتۋگە دايىنبىز»، - دەدى م. ساتوۆ.
جيىن بارىسىندا تاريح عىلىمدارىنىڭ كانديداتى، پروفەسسور، ءال- فارابي اتىنداعى قازاق ۇلتتىق ۋنيۆەرسيتەتى تاريح فاكۋلتەتىنىڭ دەكانى ارمان ءجۇمادىل، فيلوسوفيا عىلىمدارىنىڭ دوكتورى، پروفەسسور زەينابىل ايداربەكوۆ، «مەملەكەتتىك تىلگە قۇرمەت» قوعامدىق بىرلەستىگىنىڭ جەتەكشىسى اسىلى وسمان، «گەنەرالدار كەڭەسى» رەسپۋبليكالىق قوعامدىق بىرلەستىگىنىڭ ءتوراعاسى رۇستەم قايداروۆ، «نۇر وتان» پارتياسى الماتى قالالىق فيليالىنىڭ باسپا ءسوز حاتشىسى قايىم- مۇنار تابييەۆ دوڭگەلەك ۇستەل بارىسىندا ءسوز الىپ، قازاق مەملەكەتتىلىگىنىڭ تاريحى، ەل اۋماعىنداعى قازاق حاندىعىنىڭ مەرەيتويىن اتاپ ءوتۋ شارالارىنا كەڭىنەن توقتالدى.
سونىمەن قاتار، جيىندا ۇلتتىق ۇلان جاۋىنگەرلەرىنىڭ ەل قاۋىپسىزدىگىن قامتاماسىز ەتۋ جولىنداعى قىزمەتى ءسوز بولدى.
اۆتور: گۇلميرا عوسمانالي
