تۇركى كەڭەسىنە مۇشە ەلدەرگە جاڭا وقۋ جىلىنىڭ باعدارلاماسىنا قازاق حاندىعىنىڭ 550 جىلدىعىنا وراي ماتەريالداردى قوسۋ ۇسىنىلدى
مۇنداي ۇسىنىستى بۇگىن تۇركى كەڭەسى ءبىلىم مينيسترلەرىنىڭ 4- وتىرىسىندا قىرعىز ءبىلىم جانە عىلىم ءمينيسترىنىڭ ورىنباسارى ادىلەت بەكبويەۆ جاسادى.
«ءبىز، قىرعىز تاراپى تۇركى كەڭەسىنە مۇشە ەلدەردىڭ ءبىلىم مينيسترلىكتەرىنە جاڭا وقۋ جىلىنىڭ باعدارلاماسىنا ءجۇسىپ بالاساعۇننىڭ 1000 جىلدىعىنا جانە قازاق حاندىعىنىڭ 550 جىلدىعىنا وراي ءبىلىم بەرۋ ماتەريالدارىن قوسۋدى ۇسىنامىز. وسى رەتتە سىزدەردى اتاۋلى مەرەكەلەرىڭىزبەن قۇتتىقتاپ وتكىم كەلەدى»، - دەدى ول.
ايتا كەتەيىك، تۇركى كەڭەسى ءبىلىم مينيسترلەرىنىڭ 4- وتىرىسىنا ق ر ءبىلىم جانە عىلىم ءمينيسترى اسلان ءسارىنجىپوۆ، تۇركى كەڭەسىنىڭ باس حاتشىسى راميل حاسانو، ازەربايجان ءبىلىم جانە عىلىم ءمينيسترىنىڭ ورىنباسارى فيرۋدين گۋربانوۆ، قىرعىز ءبىلىم جانە عىلىم ءمينيسترىنىڭ ورىنباسارى ادىلەت بەكبويەۆ، تۇركيا ۇلتتىق ءبىلىم مينيسترلىگىنىڭ جاۋاپتى حاتشىسى يۋسۋف تەكين، حالىقارالىق تۇركى اكادەمياسىنىڭ پرەزيدەنتى دارحان قىدىرالى قاتىستى.
وتىرىس بارىسىندا ورتاق تۇركى تاريحى، ورتاق گەوگرافياسى جانە ورتاق ادەبيەتى وقۋلىعىنا بايلانىستى جۇمىستار تالقىلاندى. تاراپتاردىڭ ماقۇلداۋىنان كەيىن وقۋلىقتار مەكتەپ باعدارلاماسىنا ەنگىزىلەتىن بولادى.
