قازاق حاندىعىنىڭ 550 جىلدىعى مەرەيتويىنداعى جارقىن وقيعالاردىڭ ءبىرى - «ماڭگىلىك ەل» تەاترلاندىرىلعان قويىلىمى بولماق
بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە ق ر مادەنيەت جانە سپورت مينيسترلىگى مادەنيەت جانە ونەر ىستەرى دەپارتامەنتىنىڭ ديرەكتورى اقتوتى رايىمقۇلوۆا ءمالىم ەتتى.
«قازاق حاندىعىنىڭ مەرەيتويى ەكى كەزەڭدە وتەدى: ءبىرىنشىسى - استانادا، ال ەكىنشىسى - تارازدا. استاناداعى سالتاناتتى شارالار 11 - قىركۇيەكتە ۇيىمداستىرىلادى»، - دەدى دەپارتامەنت ديرەكتورى.
ونىڭ سوزىنە قاراعاندا، سول كۇنى تاۋەلسىزدىك سارايىندا مەملەكەت باسشىسىنىڭ قاتىسۋىمەن تاۋەلسىزدىك سارايىندا قازاق حاندىعىنىڭ 550 جىلدىعىنا ارنالعان سالتاناتتى جيىن وتەدى.
ال تۇستەن كەيىن نازاربايەۆ ۋنيۆەرسيتەتىندە «ماڭگىلىك ەل» تاقىرىبىندا حالىقارالىق عىلىمي- تاجىريبەلىك كونفەرەنسيا ۇيىمداستىرىلماق. وعان مىڭنان استام وتاندىق جانە شەتەلدىك عالىمدار، حالىقارالىق ساراپشىلار، دەپۋتاتتار مەن ۇيىمداردىڭ وكىلدەرى قاتىسادى دەپ كۇتىلۋدە.
مۇنىمەن قوسا، كەشقۇرىم «بارىس» مۇز سارايىندا تەاترلاندىرىلعان اۋقىمدى مەرەكەلىك قويىلىم وتەدى.
بەلگىلى بولعانداي 9 - قازاندا تارازدا جالعاساتىن ەكىنشى كەزەڭ اياسىندا «قازاق حاندىعىنا 550» مونۋمەنتىن سالتاناتتى تۇردە اشۋ، «كونە تاراز» مۇراجايىنىڭ اشىلۋى، سونداي- اق ءبىرقاتار مادەني شارالار قامتىلىپ وتىر.
ءوز كەزەگىندە استانا قالاسى مادەنيەت باسقارماسىنىڭ باسشىسى بولات ماجاعۇلوۆ ەلوردادا وتەتىن باعدارلاماعا ءساندى قولدانبالى ونەر كورمە- جارمەڭكەسى، حالىق شەبەرلەرىنىڭ كورمەسى، ەلىمىزدىڭ ۇزدىك شىعارماشىلىق ۇجىمدارىنىڭ كونسەرتتەرى كىرەتىندىگىن اتاپ ءوتتى.
«قازاق حاندىعىنىڭ 550 جىلدىعى اياسىنداعى مادەني شارالاردىڭ نەگىزگىلەرىنىڭ ءبىرى رەسپۋبليكا ايماقتارىنىڭ قاتىسۋىمەن «قازاق ەلى» مونۋمەنتى ماڭىنداعى الاڭدا وتەتىن ەتنو- اۋىل مەن بۇقارالىق سەرۋەن بولىپ تابىلادى. «قازاق ەلى» مونۋمەنتى الاڭى ءۇش كۇنگە ەلوردا تۇرعىندارى مەن قالا قوناقتارى تاماشالاي الاتىن ۇلكەن ەتنو- اۋىلعا اينالادى. الاڭدا ەلۋ كيىز ءۇي تىگىلىپ، ەكى ۇلكەن ساحنا، التىباقاندار، سپورتتىق الاڭدار، تايقازاندار جانە باسقا دا نىساندار ورناتىلادى»، - دەدى باسقارما باسشىسى.
اۆتور: رۋسلان عابباسوۆ
