ق ر ۆيتسە-پرەمەرى تارازدا ايماقتىڭ قازاق حاندىعىنىڭ 550 جىلدىعىنا ارنالعان مەرەيتويلىق سالتاناتتاردى وتكىزۋگە ازىرلىگىن تەكسەرۋدە
بۇل الداعى مەرەيتويعا دايارلىقتى جەكە باقىلاۋىنا العان ب. ساپاربايەۆتىڭ بيىل وبلىسقا جاساپ وتىرعان ءۇشىنشى ساپارى.
ول كىرەبەرىس اركاسىن بۇرىنعى قالپىنا كەلتىرۋ، قازاق حاندىعى قۇرىلۋىنىڭ 550 جىلدىعىنا ارنالعان ەسكەرتكىشتى ورناتۋ، تاۋكە حان كوشەسىندەگى كوپىردى بۇرىنعى قالپىنا كەلتىرۋ، تۇڭعىش پرەزيدەنت ساياباعىنىڭ جانىندا، «تاراز» ءقوناقۇيىنىڭ الدىندا، قاراحان كەسەنەسىنىڭ جانە ۆوكزالدىڭ قاسىنداعى ساياباقتاردى قالپىنا كەلتىرۋ بارىسىمەن تانىسادى.
ق ر ۆيتسە- پرەمەرى وتكەن ساپارى كەزىندە جۇمىس بارىسى الاڭداتقان بولاشاق «ەجەلگى تاراز» تاريحي- مادەني ورتالىعىنا دا بارادى. ول كەزدە الداعى جۇمىستىڭ ۇلكەن كولەمى جانە ءىستىڭ شىنايى جاعدايىمەن تانىسىپ وتكەن ول جۇمىستاردى كەستەدە بەلگىلەنگەن مەرزىمدە اياقتاۋ مۇمكىندىگىنە قاتىستى كۇمانىن ءبىلدىرىپ، «ەجەلگى تاراز» نىسانىندا تاۋلىك بويى جۇمىس ىستەۋگە كەڭەس بەردى.
«ۇلگەرۋ ءۇشىن كۇندىز دە، تۇندە دە جۇمىس ىستەۋ كەرەك. مەملەكەت باسشىسى قازاق حاندىعىنىڭ مەرەيتويىن اتاپ وتۋگە ۋاقىتىلى دايىندالۋدى تاپسىردى، ءبىز ەلباسىنىڭ تاپسىرمالارىن ورىداپ، بارلىق نىسانداردى ساپالى ءارى مەرزىمىندە اياقتاۋىمىز كەرەك»، - دەدى ب. ساپاربايەۆ.
ۆيتسە- پرەمەر قۇرىلىس جانە جوندەۋ جۇمىستارىنىڭ ساپاسىنا ەرەكشە كوڭىل ءبولىپ، ارتىق شىعىنداردى بولدىرماۋ ءۇشىن قارجى بولىگىن باقىلاپ وتىرۋدى، بەلگىلەنگەن جۇمىستاردىڭ كورسەتىلگەن مەرزىمدە اياقتالۋىن تالاپ ەتۋدە.
ەستەرىڭىزگە سالا كەتەيىك، قازاق حاندىعىنىڭ 550 جىلدىعىن اتاپ ءوتۋ بيىل ەلىمىزدىڭ بۇكىل ايماقتارىندا ءوتىپ جاتىر. 550 جىل بۇرىن جامبىل وبلىسىنداعى تالاس جانە شۋ وزەندەرىنىڭ اراسىندا كەرەي مەن جانىبەك سۇلتاندار قازاق حاندىعىنىڭ نەگىزىن قالاعان جەردە ماڭىزدى شارالار بولىپ وتەدى. ولاردىڭ اراسىندا تەاترلاندىرىلعان كورىنىس، «ماڭگىلىك ەل» اتتى رەسپۋبليكالىق اقىندار ايتىسى، «قازاق حاندىعىنىڭ قۇرىلۋى جانە تاريحى» كىتابىنىڭ تۇساۋكەسەرى، «تاراز - عاسىرلار كۋاسى» كورمەسى، ق ر پرەزيدەنتىنىڭ جۇلدەسى ويناتىلاتىن قازاقشا كۇرەس بويىنشا «ەۋرازيا بارىسى» حالىقارالىق جارىسى بار.
بۇدان باسقا، تارازدا «ەجەلگى تاراز» جوباسى ىسكە اسىرىلۋدا، «قازاق حاندىعىنىڭ 550 جىلدىعى» ەسكەرتكىشى اشىلادى جانە قىتايلىق سيان قالاسىنان ۇلى جىبەك جولى باعدارىمەن كەلە جاتقان كەرۋەن ەكسپەديتسياسىنىڭ قاتىسۋشىلارىمەن كەزدەسۋ بولىپ وتەدى.
